აშშ-ს პრეზიდენტი დონალდ ტრამპი აცხადებს, რომ ირანი აშშ-სა და მსოფლიოს ეთამაშება.

"ირანი 47 წელია ეთამაშება შეერთებულ შტატებს და მსოფლიოს დანარჩენ ქვეყნებს (გადადება, გადადება, გადადება!)" , - დაწერა ტრამპმა სოციალურ ქსელში.

მან გააკრიტიკა ყოფილი პრეზიდენტი ბარაქ ობამა ირანთან დადებული ხელშეკრულების გამო და განაცხადა, რომ "ბარაკ ჰუსეინ ობამა არა მხოლოდ მათ მიმართ კეთილი იყო, არამედ შესანიშნავიც, ფაქტობრივად, მათ მხარეს დადგა, მიატოვა ისრაელი და ყველა სხვა მოკავშირე და ირანს ახალი, ძალიან ძლიერი სიცოცხლე მისცა".

ტრამპის თქმით, ირანელებმა "საბოლოოდ ყველაზე დიდი ნაძირალა იპოვეს, სუსტი და სულელი ამერიკელი პრეზიდენტის სახით".

"ის ჩვენი „ლიდერის“ რანგში კატასტროფა იყო, მაგრამ არა ისეთი ცუდი, როგორც მძინარე ჯო ბაიდენი!", - წერს ტრამპი.

მისი თქმით, ირანი ვეღარ გაიცინებს.

"47 წლის განმავლობაში ირანელები გვატყუებდნენ, გვალოდინებდნენ, ჩვენს ხალხს ნაღმებით კლავდნენ, საპროტესტო აქციებს ახშობდნენ და ახლახანს 42 000 უდანაშაულო, უიარაღო მომიტინგე მოკლეს და ახლა უკვე ჩვენს დიდებულ ქვეყანას დასცინოდნენ. ისინი ვეღარ გაიცინებენ! ", - დაწერა ტრამპმა.

ცნობისთვის, დღეს მედიაში გავრცელდა ინფორმაცია, რომ ირანმა აშშ-ის მიერ კონფლიქტის დასრულების შესახებ შეთავაზებულ უახლეს წინადადებაზე პასუხი გაგზავნა.

CNN-ი ირანულ მედიაზე დაყრდნობით წერდა, რომ ირანის ისლამური რესპუბლიკის პასუხი აშშ-ის შეთავაზებაზე პაკისტანელი შუამავლის მეშვეობით წარადგინეს.

ირანის პასუხის დეტალები არ გახმაურებულა. ცნობილია მხოლოდ ის, რომ „შეთავაზებული ჩარჩოს თანახმად, მოლაპარაკებები ამ ეტაპზე რეგიონში ომის დასრულების საკითხზე იქნება ფოკუსირებული“.