ევროკავშირის უმაღლესი წარმომადგენელის საგარეო საქმეთა და უსაფრთხოების პოლიტიკის საკითხებში, კაია კალასის განცხადებით, რუსეთთან მოლაპარაკებებში ევროკავშირის წარმომადგენლის პოზიციაზე გერმანიის ყოფილი კანცლერის, გერჰარდ შრედერის დანიშვნა არ შეიძლება.

როგორც კაია კალასმა ბრიუსელში, ევროკავშირის საგარეო საქმეთა მინისტრების შეხვედრის დაწყებამდე განაცხადა, რუსეთთან მოლაპარაკებებში ევროკავშირის წარმომადგენლის პოზიციაზე გერმანიის ყოფილი კანცლერის, გერჰარდ შრედერის დანიშვნა ცუდი არჩევანი იქნებოდა.

„ვფიქრობ, გერჰარდ შრედერი ლობისტი იყო. ის რუსული სახელმწიფო კომპანიების მაღალი რანგის ლობისტი იყო. ამიტომ გასაგებია, რატომ სურს პუტინს სწორედ ეს ადამიანი, რათა, არსებითად, მოლაპარაკებების მაგიდის ორივე მხარეს თავად იჯდეს. თუ რუსეთს უფლებას მივცემთ, რომ ჩვენი სახელით თავად დანიშნოს მომლაპარაკებელი, ეს გონივრული ნაბიჯი არ იქნება“, - განაცხადა კალასმა.

ცნობისთვის, რუსეთის პრეზიდენტმა ვლადიმერ პუტინმა 9 მაისს გამართულ პრესკონფერენციაზე განაცხადა, რომ გერმანიის ყოფილი კანცლერი გერჰარდ შრედერი, უკრაინის წინააღმდეგ ომის დასრულების მიზნით მოლაპარაკებებში ევროკავშირის წარმომადგენლის პოზიციაზე მისი „სასურველი“ კანდიდატი იქნებოდა.