საქართველოს ბიზნეს ასოციაცია ეხმაურება სრულიად საქართველოს კათოლიკოს-პატრიარქის არჩევის ისტორიულ გადაწყვეტილებას და ხაზს უსვამს ამ მოვლენის ფუნდამენტურ მნიშვნელობას ქვეყნის სტაბილურობისა და მშვიდობისთვის.

„საქართველოს ბიზნეს ასოციაცია ულოცავს უწმინდესსა და უნეტარეს შიო III-ს, სრულიად საქართველოს კათოლიკოს-პატრიარქად არჩევას და უსურვებს მას მხნეობასა და წარმატებებს ჩვენი ქვეყნისთვის ამ უაღრესად მნიშვნელოვან ასპარეზზე.

საქართველოს მართლმადიდებელ ეკლესიას, როგორც ქვეყნის უმთავრეს სულიერ და კულტურულ ინსტიტუტს, უდიდესი როლი ენიჭება სახელმწიფოებრივი მედეგობისა და საზოგადოებრივი კონსოლიდაციის პროცესში. ბიზნეს საზოგადოება მიიჩნევს, რომ ეკლესიის წინამძღოლობის ახალი ეტაპი გადამწყვეტ გავლენას იქონიებს ქვეყანაში მშვიდობიანი და პროგნოზირებადი გარემოს შენარჩუნებაში, რაც ნებისმიერი ეკონომიკური წინსვლის აუცილებელი პირობაა.

სრულიად საქართველოს კათოლიკოს-პატრიარქის არჩევა არის უმნიშვნელოვანესი მოვლენა, რომელიც განსაზღვრავს ჩვენი ქვეყნის სულიერ და საზოგადოებრივ ცხოვრებას მომავალი ათწლეულების განმავლობაში. ბიზნეს სექტორისთვის ეკლესია ყოველთვის იყო და რჩება ტრადიციული ღირებულებებისა და ეროვნული ერთიანობის უმნიშვნელოვანეს გარანტად.

ინსტიტუციური მდგრადობა და ეკლესიის მტკიცე წინამძღოლობა წარმოადგენს იმ მყარ საყრდენს, რომელზეც დგას ქვეყნის ერთობა. ამ ისტორიული გადაწყვეტილებით კიდევ ერთხელ დასტურდება ქართული სახელმწიფოებრიობის უწყვეტობა და ერთგულება იმ ფასეულობებისადმი, რომლებიც საუკუნეების მანძილზე განსაზღვრავდა საქართველოს თვითმყოფადობას. მშვიდობიანი და სტაბილური განვითარების გზაზე, ეკლესიის როლი საზოგადოებრივი წონასწორობის შენარჩუნებაში შეუფასებელია, რაც აისახება ქვეყნის საერთო კეთილდღეობასა და განვითარებაზე.

საქართველოს ბიზნეს ასოციაცია ულოცავს სრულიად საქართველოს ამ უაღრესად მნიშვნელოვან დღეს", - ნათქვამია საქართველოს ბიზნეს ასოციაციის განცხადებაში.

(R)