უკრაინის პრეზიდენტ ვოლოდიმირ ზელენსკისა და რუსეთის პრეზიდენტ ვლადიმერ პუტინს შორის საუბარი მოულოდნელად არ მოხდება, როგორც „მეხის გავარდნა მოწმენდილ ცაზე“, - ამის შესახებ უკრაინის პრეზიდენტის ადმინისტრაციის ხელმძღვანელმა, კირილ ბუდანოვმა განაცხადა.

სლოვაკეთის პრემიერ-მინისტრ რობერტ ფიცოს განცხადებას, რომ ზელენსკიმ პუტინთან შესახვედრად ჯერ მასთან უნდა დარეკოს, ბუდანოვმა, თავდაპირველად, ხუმრობით უპასუხა და განაცხადა, რომ „მეომარ ქვეყნებს შორის სახელმწიფოთაშორისი სატელეფონო ხაზები გათიშულია“ და რომ „ასეთი ზარები მობილური ტელეფონით არ ხორციელდება“.

„სერიოზულად რომ ვთქვათ, თუ რუსეთი ნამდვილად მზადაა სერიოზული დისკუსიისთვის, უკრაინაც მზად იქნება“, - აღნიშნა ბუდანოვმა.

მან ასევე ხაზი გაუსვა, რომ უკრაინა მზადაა რუსეთთან ომი დაასრულოს.

„უკრაინამ არაერთხელ გაუსვა ხაზი და თავისი ქმედებებით დაამტკიცა, რომ ჩვენ ომის დასრულების, მშვიდობის მომხრე ვართ. ეს არის უკრაინის ოფიციალური პოზიცია, რომელსაც მხარს უჭერს უკრაინის პრეზიდენტი. ჩვენ საომარი მოქმედებების შეწყვეტის მომხრე ვართ. კიდევ ერთხელ მინდა გავიმეორო: მშვიდობის დამყარება სისუსტის ნიშანი კი არა, საღი აზრის დასტურია“, - აღნიშნა ბუდანოვმა.