უკრაინის ეროვნულმა ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ გამოავლინეს ორგანიზებული ჯგუფი, რომელიც კიევის მახლობლად ელიტურ სამშენებლო პროექტებში 460 მილიონი გრივნის გათეთრებაში იყო ჩართული, - ინფორმაციას უკრაინული მედია ეროვნული ანტიკორუფციული ბიუროს პრესსამსახურზე დაყრდნობით ავრცელებს.

„მის ერთ-ერთ მონაწილეს, უკრაინის პრეზიდენტის ადმინისტრაციის ყოფილ ხელმძღვანელს, ეჭვმიტანილობის შესახებ შეტყობინება გადაეცა“, - აღნიშნულია უწყების განცხადებაში.

ანტიკორუფციულ ბიუროს აღნიშნული პირის ვინაობა არ დაუსახელებია, თუმცა, მანამდე გავრცელდა ინფორმაცია, რომ ანტიკორუფციული ბიურო ჩხრეკას ატარებდა და პრეზიდენტის ადმინისტრაციის ყოფილ ხელმძღვანელს, ანდრეი ერმაკს შეტყობინებას გაუგზავნიდა.

უკრაინის ეროვნული ანტიკორუფციული ბიუროს ცნობით, საქმე კლასიფიცირებულია უკრაინის სისხლის სამართლის კოდექსის 209-ე მუხლის მე-3 ნაწილით (დანაშაულებრივი გზით მოპოვებული ქონების ლეგალიზაცია (გათეთრება)). ამჟამად მიმდინარეობს გადაუდებელი საგამოძიებო მოქმედებები.

უკრაინის ეროვნული ანტიკორუფციული ბიურო განმარტავს, რომ პროექტის აქტიური მშენებლობის ფაზა 2021 წლის ივნისში დაიწყო. ამ პერიოდშივე ეჭვმიტანილებმა სცადეს დანაშაულებრივი გზით მოპოვებული თანხების გათეთრება. ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის ცნობით, 2021-2025 წლებში თითქმის 9 მილიონი დოლარის ოდენობის თანხები გათეთრდა. ეროვნული ანტიკორუფციული ბიუროს ცნობით, ეს თანხა სხვადასხვა წყაროდან იყო მიღებული, მათ შორის „ენერგოატომის“ კორუფციული სქემებიდან.

გარდა ამისა, უწყების ცნობით, მედიაში გაშუქების შემდეგ, მესაკუთრეებმა სცადეს რეზიდენცია „დინასტიის“ მიწის ნაკვეთებისა და დაუმთავრებელი სამშენებლო პროექტების შესაძლო ჩამორთმევისგან გათავისუფლება, თუმცა, გამოძიების დროს, უმაღლესმა ანტიკორუფციულმა სასამართლომ დააკმაყოფილა ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის შუამდგომლობა და მათ მიწის ნაკვეთები და ხუთი დაუმთავრებელი სამშენებლო პროექტი ჩამოართვა.