კირ სტარმერმა მინისტრთა კაბინეტს განუცხადა, რომ გადადგომას არ აპირებს, - ამის შესახებ განცხადებას დიდი ბრიტანეთის პრემიერ-მინისტრის ადმინისტრაცია ავრცელებს.

დიდი ბრიტანეთის პრემიერ-მინისტრმა კირ სტარმერმა კაბინეტთან შეხვედრაზე განაცხადა, რომ გასულ კვირას გამართულ ადგილობრივი არჩევნების შედეგებზე პასუხისმგებლობას იღებს.

„ბოლო 48 საათი მთავრობისთვის დესტაბილიზაციის გამომწვევი იყო და ამან ჩვენი ქვეყნისა და ოჯახებისთვის რეალური ეკონომიკური ხარჯი მოიტანა. „ლეიბორისტულ პარტიას“ ლიდერის გამოწვევის პროცესი აქვს და ეს ჯერ არ ამოქმედებულა. ქვეყანა ჩვენგან მმართველობის გაგრძელებას ელის. ეს არის ის, რასაც მე ვაკეთებ და რაც კაბინეტმა უნდა გააკეთოს“, - ნათქვამია დიდი ბრიტანეთის პრემიერ-მინისტრის ადმინისტრაციის განცხადებაში.

კაბინეტის შეხვედრამდე რამდენიმე უმცროსმა მინისტრმა თანამდებობა დატოვა, ხოლო „ლეიბორისტული პარტიის“ 80-ზე მეტმა დეპუტატმა სტარმერს გადადგომის თარიღის გამოცხადებისკენ მოუწოდა.

ცნობისთვის, 7 მაისს დიდ ბრიტანეთში გამართულ ადგილობრივ არჩევნებში მმართველი „ლეიბორისტული პარტია“ დამარცხდა. 136 ადგილობრივ საბჭოში ჩატარებული არჩევნების შედეგების მიხედვით, ნაიჯელ ფარაჯის პარტიამ „გაერთიანებული სამეფოს რეფორმა“ 1453 ადგილი მოიპოვა და პირველი ადგილი დაიკავა. „ლეიბორისტულმა პარტიამ“ 1068 ადგილი

მოიპოვა და წინა არჩევნების შედეგებთან შედარებით მისი მანდატების რაოდენობა 1496-ით შემცირდა. „ლიბერალ-დემოკრატებმა“ 844 ადგილი მოიპოვეს, რაც წინა მაჩვენებელზე 155-ით მეტია. „კონსერვატორებმა“ 801 მანდატი მიიღეს და მათი მაჩვენებლები 563-ით შემცირდა. „მწვანეთა პარტიამ“ 587 მანდატი მიიღო და წინა არჩევნებთან შედარებით მათი მაჩვენებელი 411-ით გაიზარდა