აშშ-ის ომის მინისტრის პიტ ჰეგსეთის განცხადებით, პენტაგონმა უკრაინაში სამხედრო მოსამსახურეები გაგზავნა, რათა რეალურ საბრძოლო პირობებში დრონების გამოყენება ისწავლონ. უკრაინული მედიის ცნობით, ჰეგსეთმა ეს განცხადება სენატის საკომიტეტო მოსმენაზე გააკეთა.

მოსმენის დროს უმცირესობის ლიდერმა მიჩ მაკკონელმა უკრაინას „ომის სილიკონის ველი“ უწოდა და ჰეგსეთს ჰკითხა, მხარს უჭერს თუ არა პენტაგონის ოფიციალური პირების ქვეყანაში გამგზავრებას, რათა მათ გამოცდილებიდან ისწავლონ.

ჰეგსეთმა ხაზი გაუსვა, რომ მან პირადად დაამტკიცა დამატებითი პერსონალის უკრაინაში გაგზავნა.

„პირადად დავამტკიცე დამატებითი პერსონალის განლაგება დრონების ბრძოლის ველის შესასწავლად - როგორც შეტევითი, ასევე თავდაცვითი - რათა შევძლოთ ამ კონფლიქტიდან ყველა შესაძლო გაკვეთილის ათვისება და მათი რეალურ დროში გამოყენება, როდესაც ვახორციელებთ თავდაცვით და შეტევით ოპერაციებს იმ ეპოქაში, როდესაც დრონების დომინირება აუცილებელი გახდა“, - განაცხადა აშშ-ის ომის მინისტრმა.

ცნობისთვის, გუშინ მედიაში გავრცელდა ინფორმაცია, რომ აშშ-სა და უკრაინის მთავრობებმა მოამზადეს მემორანდუმის პროექტი, რომელიც განსაზღვრავს ქვეყნებს შორის დრონების სფეროში შესაძლო ახალი თავდაცვის შეთანხმების პირობებს.