რუსეთის სახელმწიფო დუმამ კანონპროექტი მიიღო, რომელიც საზღვარგარეთ დაკავებული რუსეთის მოქალაქეების დასაცავად შეიარაღებული ძალების გამოყენების უფლებას იძლევა, - ინფორმაციას რუსული მედია ავრცელებს.

რუსეთის სახელმწიფო დუმის დეპუტატებმა მეორე და მესამე მოსმენით მიიღეს კანონპროექტი, რომელიც საზღვარგარეთ დაკავების, სისხლისსამართლებრივი ან სხვა სახის დევნის შემთხვევაში რუსეთის მოქალაქეების დასაცავად ქვეყნის შეიარაღებული ძალების გამოყენების უფლებას ითვალისწინებს.

კანონპროექტის თანახმად რუსეთის სახელმწიფო უწყებები შეიარაღებული ძალების გამოყენებას ქვეყნის პრეზიდენტის გადაწყვეტილებით შეძლებენ.

ახლა კანონპროექტს ხელი რუსეთის პრეზიდენტმა უნდა მოაწეროს, ხოლო ძალაში მისი გამოქვეყნებიდან 10 დღის შემდეგ შევა.