საქართველოს პროკურატურის პირადი ცხოვრების ხელყოფის წინააღმდეგ მიმართული საინფორმაციო კამპანია გრძელდება. ამის შესახებ ინფორმაციას პროკურატურა ავრცელებს.

შეხვედრები პროკურორებმა თბილისის N61, N55, N41, N106, N145, N176, N29 საჯარო და კერძო სკოლა „ალბიონში“ გამართეს.

„საინფორმაციო შეხვედრებზე პროკურორებმა დეტალურად განიხილეს პირადი ცხოვრების ხელყოფის სამართლებრივი ასპექტები. ასევე ისაუბრეს პირადი საიდუმლოების დაცვის მნიშვნელობაზე, შესაბამის პასუხისმგებლობასა და კანონით გათვალისწინებულ სასჯელებზე.

შეხვედრების ფარგლებში მოსწავლეები ასევე გაეცნენ მოწმისა და დაზარალებულის კოორდინატორის სამსახურის საქმიანობას. აღინიშნა, რომ კოორდინატორის პრიორიტეტია დაზარალებულთა და მოწმეთა ინტერესების დაცვა, მათი ემოციური მხარდაჭერა და ხელახალი (მეორეული) ვიქტიმიზაციის პრევენცია.

შეხვედრები ინტერაქტიულ რეჟიმში წარიმართა. მოსწავლეებმა მათთვის საინტერესო კითხვებზე პროკურორებისგან ამომწურავი პასუხები მიიღეს.

საინფორმაციო შეხვედრების მთავარი მიზანი მოზარდებში სამართლებრივი ცნობიერების ამაღლება და დანაშაულის პრევენციაა”, - ნათქვამია ინფორმაციაში.