ვფიქრობ, რომ უფრო დადგმული სპექტაკლია იმ დროსა და ვითარებაში, რომელიც აწყობს დღევანდელ ე.წ. ხელისუფლებას, - ამის შესახებ პარტია „თავისუფლების მოედნის“ წევრმა, კახა ჩიქოვანმა განაცხადა, რითაც ჯაშუშობის ბრალდებით დაკავებებს გამოეხმაურა.

„პალიტრანიუსის“ გადაცემაში „360 გრადუსი“ კახა ჩიქოვანმა განაცხადა, რომ ჯაშუშობის ბრალდებით ორი პირის დაკავება შეიძლება იყოს ხელისუფლების მხრიდან „დასავლეთის წინაშე კეკლუცი“.

„მათ წესით და კანონით წვდომა არ უნდა ჰქონოდათ არანაირ საიდუმლო ინფორმაციაზე, რომელიც იქნებოდა სახელმწიფო უსაფრთხოებისთვის მნიშვნელოვანი და ღირებული სხვა ქვეყნის სპეციალური სამსახურებისთვის. შესაბამისად, მათ ან ჰქონდათ კავშირი იმ ხალხთან, ვინც არის ამ ინფორმაციის მატარებელი, ან აბსოლუტურად სხვა საქმიანობას ეწეოდნენ. უფრო აქეთ ვიხრები, ისინი ეწეოდნენ პროპაგანდისტულ საქმიანობას უცხო ქვეყნის სპეცსამსახურების დახმარებით, მათი ფულით, ფინანსებით. ისინი იყვნენ ე.წ. რბილი ძალის გამტარებლები საქართველოში. როდესაც ლაპარაკია ჯაშუშობაზე, ქვეყნის ღალატზე, ინფორმაციის გადაცემაზე, გამოძიებამ უნდა გვაჩვენოს, რა ტიპის და რა სახის ინფორმაციას აწვდიდა, ან რა ტიპის დავალებებს იღებდა იქიდან და რაში ტრანსფორმირდებოდა ადგილზე, თუმცა სასამართლო სხდომები დახურული იქნება და ჩვენ აბსოლუტურად მოკლებული ვიქნებით ამის საშუალებას. მე ვფიქრობ, რომ ეს უფრო დადგმული სპექტაკლია იმ დროსა და ვითარებაში, რომელიც აწყობს დღევანდელ ე.წ. ხელისუფლებას. ეს შეიძლება იყოს დასავლეთის წინაშე კეკლუციც. რამდენიმე აუდიტორიას ელაპარაკებიან თავისი საქმიანობით და ქმედებით, ესაა როგორც დასავლეთი, აშშ, ევროპა და ამავე დროს შიდა აუდიტორიას ელაპარაკებიან, იმ მომხრეებს ელაპარაკებიან, რომელიც ჯერ კიდევ დარჩენილი ჰყავთ მათ“, - განაცხადა კახა ჩიქოვანმა.