ვერავინ ქვეყანაში ვერც ერთ ფაქტს ვერ დაასახელებს, რომ ხელისუფლებამ კონკრეტულად რომელიმე მედიის წინააღმდეგ რაიმე ნაბიჯი გადადგა - როდესაც რამდენიმე პარტიული ტელევიზია რადიკალების პარტიულ დღის წესრიგს ემსახურება, მედიაში არსებული პრობლემები სწორედ იქ უნდა ვეძებოთ, - ეს განცხადება პარლამენტის კულტურის კომიტეტის თავმჯდომარემ გიორგი გაბუნიამ კომიტეტის სხდომაზე გააკეთა, სადაც საზოგადოებრივი მაუწყებლის სამეურვეო საბჭოს თავმჯდომარემ ვასილ მაღლაფერიძემ ყოველწლიური ანგარიში წარადგინა.

გაბუნიას აზრით, მედია, როგორც ინსტრუმენტი გარე ძალების მხრიდან კონკრეტული პოლიტიკური მიზნებისთვის არის გამოყენებული და პრობლემა არის ეს.

„ჩვენ სხვა პრობლემის წინაშე ვართ და ამ პრობლემის თაობაზე უნდა ითქვა. რას ნიშნავს ჟურნალისტის პროფესია? - ჟურნალისტის პროფესია ეს არის, რომ საზოგადოებას მაქსიმალურად ობიექტური ინფორმაცია მიაწოდეს ისე, რომ საკუთარი პოზიციის და პირადი დამოკიდებულებების გაჟღერებისგან თავი შეიკავოს. როდესაც ჩვენ რამდენიმე პარტიულ ტელევიზიას ვხედავთ, რომლებიც რადიკალების პარტიულ დღის წესრიგს ემსახურებიან, მედიაში არსებული პრობლემები სწორედ იქ უნდა ვეძებოთ. ეს არის სიმართლე და ეს არის პრობლემა, როდესაც მედია როგორც ინსტრუმენტი გარე ძალების მხრიდან კონკრეტული პოლიტიკური მიზნებისთვის არის გამოყენებული. აი, ეს არის პრობლემა. ვერავინ ქვეყანაში ვერც ერთ ფაქტს ვერ დაასახელებს, რომ ხელისუფლებამ კონკრეტულად რომელიმე მედიის წინააღმდეგ რაიმე ნაბიჯი გადადგა - ან სადმე მედია შეუზღუდა, ჟურნალისტის საქმიანობა შეიზღუდა და ასე შემდეგ, ამიტომ კრიტიკა გასაკვირია“, - განაცხადა გაბუნიამ პარლამენტის კულტურის კომიტეტის სხდომაზე.