ირანის სამხედრო ძალები - ისრაელის წინააღმდეგ სამხედრო ოპერაციას ვაჩერებთ, თუ მათი მხრიდან აგრესია და მტრული ქმედებები გაგრძელდება, გაცილებით მკაცრ და გამანადგურებელ ზომებს მივიღებთ
ირანის განცხადებით, ისრაელის წინააღმდეგ სამხედრო ოპერაციები შეაჩერა, თუმცა განაახლებს, თუ დარტყმები გაგრძელდება, მათ შორის სამხრეთ ლიბანში.
„ირანის ისლამური რესპუბლიკის ძლიერმა შეიარაღებულმა ძალებმა, ლიბანის დაჩაგრული ხალხის მხარდასაჭერად, მტკივნეული პასუხი გასცეს ამ რეჟიმს (ისრაელს). თუ აგრესია და მტრული ქმედებები გაგრძელდება - მათ შორის სამხრეთ ლიბანში - გაცილებით მკაცრ და გამანადგურებელ ზომებს მივიღებთ, ვიდრე მანამდე“, - ნათქვამია ირანის სამხედრო ძალების განცხადებაში, რომელსაც საინფორმაციო სააგენტო Tasnim-ი ციტირებს.
ისრაელელმა ოფიციალურმა პირმა CNN-თან ინტერვიუში განაცხადა, რომ ისრაელის პრემიერ-მინისტრის ადმინისტრაციამ მინისტრებს შეტყობინება გაუგზავნა, რომელშიც აღნიშნულია, რომ ისრაელი არ შეეგუება თეირანის მცდელობას, შექმნას ახალი წესრიგი, რომლის მიხედვითაც ბეირუთში „ჰეზბოლას“ დასაყრდენებზე დარტყმებს ისრაელში დასახლებულ ცენტრებზე ირანის თავდასხმებით პასუხობენ.
„გავაგრძელებთ მოქმედებას მთელ ლიბანში, საჭიროებისამებრ, რათა ჩვენს მოქალაქეებს ის ტერორისტული საფრთხე ჩამოვაშოროთ, რომელიც „ჰეზბოლასგან“ ემუქრებათ“, - აღნიშნა ოფიციალურმა პირმა.
