საზოგადოებრივი მაუწყებლის სამეურვეო საბჭოს წევრები ღია კონკურსის წესით აღარ შეირჩევიან. შესაბამისად, მეურვის კანდიდატების შესარჩევად პარლამენტის თავმჯდომარეს კონკურსის გამოცხადება და საკონკურსო კომისიის ფორმირება აღარ მოუწევს.

პარლამენტის რეგლამენტში დაგეგმილი ცვლილებების პროექტის ფარგლებში მათ შორის საზოგადოებრივი მაუწყებლის ბორდის წევრების არჩევის წესი იცვლება.

პარლამენტში წარდგენილი პროექტის თანახმად, მეურვეობის კანდიდატების წარდგენის უფლებამოსილების მქონე სუბიექტები სასურველ კანდიდატებს საკუთარი შეხედულებით წარადგენენ. მეურვის კანდიდატების კანონთან დადგენილ მოთხოვნებთან შესაბამისობას კი, პარლამენტის ეკონომიკურ საკითხთა კომიტეტი შეისწავლის.

მეურვის ერთ თანამდებობაზე პირის ასარჩევად პარლამენტს მეურვეობის მხოლოდ ერთი კანდიდატი წარედგინება.

“მაუწყებლობის შესახებ“ კანონის გათვალისწინებით, სამეურვეო საბჭო 11 წევრისგან – მეურვისგან შედგება. პარლამენტი ორ მეურვეს სახალხო დამცველის წარდგინებით ირჩევს, სამს – საპარლამენტო უმრავლესობაში შემავალი ფრაქციის წარდგინებით, სამს – საპარლამენტო ოპოზიციაში შემავალი იმ ფრაქციების წარდგინებით, რომლებშიც ყველაზე მეტი პარლამენტის წევრია გაერთიანებული და სამს – აჭარის ავტონომიური რესპუბლიკის უმაღლესი საბჭოს წარდგინებით.