ანა წითლიძე - პარტიაში ახალი ადამიანების ჩართვას მხოლოდ მივესალმები, მათ შორის ნანუკა ჟორჟოლიანის გადაწყვეტილებასაც, რომ ამ პროცესის ნაწილი იყოს
პარტიაში ახალი ადამიანების ჩართვას მხოლოდ მივესალმები. მათ შორის ნანუკას გადაწყვეტილებასაც, რომ ამ პროცესის ნაწილი იყოს. ყველას ვისაც პოლიტიკაში მოსვლა გინდათ, იცოდეთ, ახლა ამის დროა და ჩვენი კარი თქვენთვის ღიაა, - ამის შესახებ „ნაციონალური მოძრაობის“ წევრი, ანა წითლიძე წერს.
როგორც წითლიძე აღნიშნავს, პარტიის შიდა რეფორმისა და განახლებული მიდგომების საჭიროებაზე ბოლო ორი თევა მესამე პრეზიდენტთან, მიხეილ სააკაშვილთან მუშაობენ.
„მე დარწმუნებული ვარ, რომ „ნაციონალურმა მოძრაობამ“ ახალი სიცოცხლე უნდა შეიძინოს და ნებისმიერი გამოწვევა, მათ შორის პარტიის აკრძალვის საფრთხეც, შესაძლებლობად უნდა აქციოს.
ამისთვის საჭიროა რეალური შიდა დემოკრატია, რეფორმები და განახლებული მიდგომები. ამ საკითხებზე ბოლო ორი თვეა მიხეილ სააკაშვილთან აქტიურად ვმუშაობთ და ამაში ახალი არაფერია.
რეფორმების, მიდგომების განახლებისა და წარსულის გაანალიზების გარეშე წინ ვერ წავალთ.
სწორედ ამ თემებზე უნდა იყოს საუბარი ყრილობაზე და სწორედ ამაზე უნდა მოისმინოს პასუხები „ნაციონალური მოძრაობის“ ამომრჩეველმა.
14 წლის განმავლობაში „ნაციონალურმა მოძრაობამ“ ბევრ ახალ ადამიანს მისცა საკუთარი შესაძლებლობების რეალიზების შანსი. ბევრი წარმატებული გადაწყვეტილება ყოფილა, ზოგი ნაკლებად.
ეს ბუნებრივი პროცესია და მომავალშიც ასე იქნება.
ამიტომ პარტიაში ახალი ადამიანების ჩართვას მხოლოდ მივესალმები. მათ შორის ნანუკას გადაწყვეტილებასაც, რომ ამ პროცესის ნაწილი იყოს.
ყველას, ვისაც პოლიტიკაში მოსვლა გინდათ, იცოდეთ, ახლა ამის დროა და ჩვენი კარი თქვენთვის ღიაა“, - წერს ანა წითლიძე „ფეისბუქზე“.
ინფორმაციისთვის, საქართველოს მესამე პრეზიდენტმა, მიხეილ სააკაშვილმა „ერთიან ნაციონალურ მოძრაობაში“ რადიკალური რეფორმებისა და პარტიის განახლების მიზნით ტელეწამყვან ნანუკა ჟორჟოლიანისა და მისი გუნდის შეერთება დააანონსა.
საქართველოს მესამე პრეზიდენტი ციხიდან გავრცელებულ განცხადებაში ხაზს უსვამს ენმ-ის „სახალხო ორგანიზაციად“ გარდაქმნის აუცილებლობას, რომელიც უნდა იყოს არა ვიწრო-ელიტარული დაჯგუფება, არამედ ყველა მოქალაქის გაერთიანება.
სააკაშვილის განმარტებით, ლიდერების პატიმრობის პირობებში პარტიას ფუნდამენტური განახლება და გააქტიურება სჭირდება, რისთვისაც ტელეწამყვან ნანუკა ჟორჟოლიანს მისი სრული მანდატი და ნდობა აქვს.
