გაერთიანებული სამეფოს პრემიერ-მინისტრის, კირ სტარმერის განცხადებით, თავდაცვის მინისტრის თანამდებობაზე ჯონ ჰილი დენ ჯარვისმა შეცვალა, - ინფორმაციას Sky News-ი ავრცელებს.

„ჩემი უპირველესი მოვალეობაა დავიცვა ბრიტანელი ხალხის უსაფრთხოება და ყოველთვის გავაკეთებ იმას, რაც აუცილებელია ჩვენი ეროვნული უსაფრთხოების დასაცავად. მოხარული ვარ, რომ დენ ჯარვისს თავდაცვის მდივნად ვნიშნავ, რადგან ვაძლიერებთ ჩვენს შეიარაღებულ ძალებს და ვპასუხობთ ჩვენი ქვეყნის წინაშე არსებულ მზარდ საფრთხეებს. ლეიბორისტული მთავრობა ცივი ომის შემდეგ თავდაცვის ხარჯების ყველაზე დიდ მდგრად ზრდას ახორციელებს. სახიფათო და არასტაბილურ სამყაროში ჩვენ ჩვენს შეიარაღებულ ძალებს მივცემთ იმ შესაძლებლობებს, რომლებიც მათ სჭირდებათ ბრიტანეთის დასაცავად და ჩვენი ერის უსაფრთხოების უზრუნველსაყოფად“, - აღნიშნა სტარმერმა.

დენ ჯარვისი 2011 წლიდან პარლამენტის წევრია. 2018-2022 წლებში ის სამხრეთ იორკშირის მერი იყო. 2024 წლის საყოველთაო არჩევნების შემდეგ მთავრობაში „ლეიბორისტული პარტიის“ მოსვლის შემდეგ ის შინაგან საქმეთა სამინისტროში უსაფრთხოების მინისტრად დაინიშნა და ამ თანამდებობას დღემდე იკავებდა.

ჯარვისი 1997-2011 წლებში პარაშუტისტების პოლკში ოფიცრად მსახურობდა. ამ პერიოდში ის კოსოვოში, სიერა ლეონეში, ერაყსა და ავღანეთში იმყოფებოდა.

შეგახსენებთ, გუშინ ცნობილი გახდა, რომ გაერთიანებული სამეფოს თავდაცვის მინისტრმა, ჯონ ჰილიმ თავდაცვის ხარჯებთან დაკავშირებული უთანხმოების გამო თანამდებობა დატოვა.