ქართველ პროევროპელ დემონსტრანტებს ევროპული მომავლის მოთხოვნის გამო სასტიკად სცემენ და აწამებენ, - ასე ეხმაურება პოლონელი ევროპარლამენტარი, კშიშტოფ ბრეიზა „ტვ პირველის" მიერ გავრცელებულ ინფორმაციას, რომელიც პოლიციელების მიერ ჩადენილ ძალადობის ფაქტს ასახავს.

„საერთაშორისო საზოგადოებამ ამაზე რეაგირება უნდა მოახდინოს. ივანიშვილისა და ამ რეპრესიებზე პასუხისმგებელი ოფიციალური პირების წინააღმდეგ მეტი სანქციებია საჭირო“, - წერს კშიშტოფ ბრეიზა X-ზე.

ცნობისთვის, „ტვ პირველმა" „ნოდარ მელაძის შაბათის" ანონსი გაავრცელა, რომელიც პოლიციელების მიერ ჩადენილ ძალადობის ფაქტს ასახავს. ტელეკომპანიის ინფორმაციით, აღნიშნული ძალადობის კადრებს პოლიციელები იღებდნენ და საერთო ჩათში აგზავნიდნენ.

შინაგან საქმეთა სამინისტრო „ტვ პირველის" მიერ გავრცელებულ ინფორმაციას გამოეხმაურა და უწყებაში განმარტეს, რომ აღნიშნული დანაშაული გამოვლინდა მიმდინარე წლის თებერვლის თვეში საქართველოს შინაგან საქმეთა სამინისტროს გენერალური ინსპექციის მიერ, საიდანაც გადაგზავნილი მასალების საფუძველზე დაიწყო გამოძიება და 2026 წლის 23 თებერვალს საქართველოს პროკურატურის მიერ სამივე პოლიციელი დაკავებულ იქნა ბრალდებულის სახით.

„ერთ-ერთი ტელეკომპანიის მიერ გავრცელდა გადაცემის ანონსი, რომელიც ასახავს პოლიციელების მიერ ჩადენილ ძალადობის ფაქტს. საქმე ეხება 2022 წლის ზაფხულში, აჭარის რეგიონში, ქობულეთში, მივლინებით მყოფი, იმერეთის პოლიციის დეპარტამენტის სამ თანამშრომელს, რომლებმაც ჩაიდინეს კადრებში ასახული დანაშაული“, - ნათქვამია შსს-ს განცხადებაში.