არჩილ გორდულაძე - ირაკლი კობახიძის გუნდმა პირწმინდად გაწმინდა და გაასუფთავა პრობლემები - როგორც აღმოჩნდა, ძალადობის გუშინ გავრცელებულ კადრებსაც ვერ ვნახავდით, ამ ახალ გუნდს რომ არ გამოევლინა და მოძალადეები სამაგალითოდ არ დაესაჯა
როგორც აღმოჩნდა, ძალადობის გუშინ გავრცელებულ კადრებსაც ვერ ვნახავდით, ამ ახალ გუნდს რომ არ გამოევლინა და მოძალადეები არ დაესაჯა სამაგალითოდ!, - ასე აფასებს „ქართული ოცნების“ ერთ-ერთი დეპუტატი, არჩილ გორდულაძე „ტვ პირველის“ ეთერში გასული გადაცემის ანონსს, სადაც ჩანს, თუ როგორ სცემენ პოლიციელები მოქალაქეებს.
არჩილ გორდულაძის მტკიცებით, ირაკლი კობახიძის გუნდმა „პირწმინდად გაწმინდა და გაასუფთავა პრობლემები“.
„ბიძინა ივანიშვილის პოლიტიკაში შემობრუნებამდე ფაქტია, რომ კორუფციულ შემთხვევებთან ერთად სხვადასხვა ცალკეული პრობლემებიც იყო. ამიტომ გადაწყვიტა პოლიტიკაში დაბრუნება და თქვა კიდეც!
ხელისუფლება მთლიანად კობახიძის გუნდს - პრაქტიკულად სხვა ხალხს, მთავრობისა და ძალოვნების ახალ შემადგენლობას გადასცა, რომლებმაც პირწმინდად გაწმინდეს და გაასუფთავეს ეს პრობლემები, კორუფციაზე უმაღლესი თანამდებობის პირები დააკავეს და ისიც ფაქტია, რომ არც ის პოლიციელები დაინდეს, ვინც დანაშაული ჩაიდინა.
როგორც აღმოჩნდა, ძალადობის გუშინ გავრცელებულ კადრებსაც ვერ ვნახავდით, ამ ახალ გუნდს რომ არ გამოევლინა და მოძალადეები არ დაესაჯა სამაგალითოდ!
რაც შეეხება ინფორმაციის დამალვას, რომ დანაშაულში მხილებული პირები დაკავებულები არიან, სწორედ ეს არის მავნებლობა და ინფორმაციული ძალადობა ადამიანებზე. ამაზე უფრო ვრცლად ვისაუბრებთ დღეს დებატებში „იმედზე!“- წერს „ფეისბუქზე“ გორდულაძე.
ცნობისთვის, „ტვ პირველმა" „ნოდარ მელაძის შაბათის" ანონსის კადრები გაავრცელა, რომელიც პოლიციელების მიერ ჩადენილ ძალადობის ფაქტს ასახავს. ტელეკომპანიის ინფორმაციით, აღნიშნული ძალადობის კადრებს პოლიციელები იღებდნენ და საერთო „ჩათში " აგზავნიდნენ.
გადაცემის ანონსის გასვლის შემდეგ შსს-მ განცხადება გაავრცელა, სადაც განმარტავს, რომ პოლიციელების მიერ ჩადენილი ფაქტი 2022 წელს მოხდა, ხოლო აღნიშნული პოლიციელები 2026 წლის თებერვალში დააკავეს.
