ვფიქრობ, რომ საქართველოს ყველა მოქალაქე უნდა გაერთიანდეს მიზნის გარშემო, რომ არ მივცეთ მოძალადეების და სადისტების ხელისუფლებას ჩვენი მართვის და ჩვენზე ბატონობის შესაძლებლობა,- ამის შესახებ „ოპოზიციური ალიანსის" წევრმა ნუგზარ წიკლაურმა „ინტერპრესნიუსს" განუცხადა, რითაც გამოეხმაურა „ტვ. პირველის” ეთერში გასულ კადრებს, სადაც ჩანს, თუ როგორ სცემენ სამართალდამცველები პოლიციის განყოფილებაში მოქალაქეებს.

ნუგზარ წიკლაურის შეფასებით, ეს კადრები უთუოდ ასახავს სისტემურ დანაშაულს საქართველოს მოქალაქეების წინააღმდეგ.

„ჩვენ ამ კადრებით, ასევე გორში მომხდარის შესახებ გავრცელებული კადრებით ვხედავთ, რომ საქართველოს ე.წ. ხელისუფლებას არ აქვს არც არგუმენტები, არც სიტყვები საქართველოს მოქალაქეებთან სასაუბროდ. ერთადერთი ენა, რომელიც მათ დარჩათ ჩვენთან სალაპარაკოდ, ეს არის ხელკეტის, ძალადობის, შეურაცხყოფის, დამცირების და ციხეში გამოკეტვის ენა, ღირსების აყრის ენა. უბრალოდ, ამის გაძლება არის შეუძლებელი, არ უნდა აიტანოს საქართველოს მოქალაქემ. როდესაც ამას ემატება ის გარემოებაც, რომ ეს მოძალადეები ჩვენს ქვეყანას უკარგავენ ევროპულ მომავალს მხოლოდ და მხოლოდ იმიტომ, რომ შეინარჩუნონ ძარცვის უფლება - ვფიქრობ, რომ საქართველოს ყველა მოქალაქე უნდა გაერთიანდეს მიზნის გარშემო, რომ არ მივცეთ მოძალადეების და სადისტების ხელისუფლებას ჩვენი მართვის და ჩვენზე ბატონობის შესაძლებლობა”,- განაცხადა წიკლაურმა.

ამ წუთებში, ფილარმონიასთან ოპოზიციის წევრები და მოქალაქეები იკრიბებიან. ისინი საპროტესტო მსვლელობას მოაწყობენ ლოზუნგით: „სისტემური წამება უნდა დასრულდეს“. დღევანდელი მსვლელობით ისინი ეხმაურებიან „ტვ.პირველის" მიერ გავრცელებულ კადრებს, სადაც ჩანს, თუ როგორ სცემენ სამართალდამცველები პოლიციის განყოფილებაში მოქალაქეებს.