გულითადად ვულოცავ აშშ-სა და ირანს სამშვიდობო შეთანხმების მიღწევას, რომელიც ითვალისწინებს დაუყოვნებლივ და მუდმივ ცეცხლის შეწყვეტას, ჰორმუზის სრუტის ხელახლა გახსნას, ასევე შემდგომი მოლაპარაკებების ჩარჩოს, - ამის შესახებ გაეროს გენერალური მდივანი ანტონიო გუტერეში სოციალურ ქსელ X-ში გამოქვეყნებულ პოსტში წერს.

მისი თქმით, შეთანხმება წარმოადგენს კრიტიკულ ნაბიჯს კონფლიქტის მშვიდობიანი გზით მოგვარებისკენ.

„დიდ მადლობას ვუხდი პაკისტანს, კატარს, ეგვიპტეს, საუდის არაბეთს, თურქეთს და რეგიონის სხვა ქვეყნებს სამშვიდობო იმ მოლაპარაკებების მხარდაჭერაში შეტანილი კონსტრუქციული როლისთვის, რომელმაც სამშვიდობო შეთანხმებამდე მიგვიყვანა“, - აცხადებს გაეროს გენერალური მდივანი.