უკრაინის პრეზიდენტის ვოლოდიმირ ზელენსკის განცხადებით, რუსეთის მიერ უკრაინაზე განხორციელებულ მასშტაბურ თავდასხმას რეაგირება მოჰყვება.

დაზიანებული კიევ-პეჩერის ლავრის მონახულებისას, ჟურნალისტმა ზელენსკის დაუსვა შეკითხვა, რას ეტყოდა ვლადიმერ პუტინს ამ თავდასხმის შემდეგ, რაზეც უკრაინის პრეზიდენტმა უპასუხა: „ვეტყვით“.

ზელენსკის თქმით, შემთხვევითი არ არის, რომ რუსებმა უკრაინაზე მასობრივი დარტყმა სწორედ მას შემდეგ განახორციელეს, რაც ვლადიმერ პუტინმა აშშ-ის პრეზიდენტ დონალდ ტრამპს დაბადების დღე მიულოცა.

„მან, როგორც ყოველთვის, ცინიკურად მიულოცა აშშ-ის პრეზიდენტს და შემდეგ უკრაინაზე მასობრივი დარტყმა განახორციელა. ვფიქრობ, შემთხვევითი არ არის, რომ მათ რამდენიმე დღე არა მხოლოდ რაკეტების შეგროვებაზე დახარჯეს, არამედ პრეზიდენტი ტრამპის მილოცვას დაელოდნენ“, - აღნიშნა ზელენსკიმ.

უკრაინის პრეზიდენტმა სოციალურ ქსელში გამოაქვეყნა ვიდეო, სადაც ჩანს, როგორ ადის სამთავრობო დელეგაციასთან ერთად ზელენსკი დაზიანებული ტაძრის სახურავზე.