როცა სხვა ქვეყნებს სიტყვით თანასწორობაზე ელაპარაკები, საქმით კი მეორეხარისხოვნად მიიჩნევ, ყოველთვისაა რისკი, თავადაც ასე მოგექცნენ, - ასე გამოეხმაურა საქართველოს პარლამენტის თავმჯდომარე, შალვა პაპუაშვილი საფრანგეთის პრეზიდენტის, ემანუელ მაკრონის პასუხს აშშ-ს პრეზიდენტის, დონალდ ტრამპის განცხადებაზე.

"აშშ-ის გადასაწყვეტი არ არის, რა კანონები გვექნება ევროპელებსა და ფრანგებს" - თქვა საფრანგეთის პრეზიდენტმა, მას შემდეგ, რაც საქართველოს "გამჭვირვალობის კანონის" მე-3 მუხლის მე-4 პუნქტი დაუწუნა.

როცა სხვა ქვეყნებს სიტყვით თანასწორობაზე ელაპარაკები, საქმით კი მეორეხარისხოვნად მიიჩნევ, ყოველთვისაა რისკი, თავადაც ასე მოგექცნენ”,- წერს პაპუაშვილი "ფეისბუქზე".

ცნობისთვის,საფრანგეთის პრეზიდენტმა ემანუელ მაკრონმა აშშ-ის პრეზიდენტის დონალდ ტრამპის მიერ New York Post-ისთვის მიცემულ ინტერვიუში გაკეთებული განცხადების შესახებ კომენტარი გააკეთა.

კერძოდ, საქმე ეხება ტრამპის განცხადებას, რომლის თანახმად, ფრანგულ ღვინოსა და შამპანურზე 100%-იან ტარიფებს დააწესებს, თუ საფრანგეთი ამერიკულ ტექნოლოგიებზე ციფრულ გადასახადს არ გააუქმებს.

მაკრონმა თქვა, რომ "აშშ-ის გადასაწყვეტი არ არის ის, თუ რა უნდა იყოს ევროპული ან ფრანგული კანონი".

„ტარიფებს სარგებელი არავისთვის მოაქვს. ციფრული გადასახადი ევროპელების მიერ მიღებული გადაწყვეტილებაა. რამდენიმე ქვეყანამ აამოქმედა. ეს ჩვენი კანონმდებლობის ნაწილია“, - აღნიშნა მაკრონმა.

როგორც ცნობილია, საფრანგეთის მიერ 2019 წელს ამოქმედებული ციფრული მომსახურების გადასახადი უმსხვილეს ტექნოლოგიურ კომპანიებზე ვრცელდება, როგორიც Meta, Amazon, Apple და Google-ია. საფრანგეთის საკონსტიტუციო სასამართლომ 2025 წელს ამერიკული კომპანია Airbnb-ისა და გერმანული Axel Springer-ის სარჩელის შემდეგ დაადგინა, რომ ციფრული მომსახურების გადასახადი კონსტიტუციურია.