აშშ-ის გადასაწყვეტი არ არის ის, თუ რა უნდა იყოს ევროპული ან ფრანგული კანონი, - ამის შესახებ საფრანგეთის პრეზიდენტმა, ემანუელ მაკრონმა ფრანგულ მედიასთან ინტერვიუში განაცხადა.

საფრანგეთის პრეზიდენტმა ემანუელ მაკრონმა ეს კომენტარი აშშ-ის პრეზიდენტის დონალდ ტრამპის მიერ New York Post-ისთვის მიცემულ ინტერვიუში გაკეთებული განცხადების შესახებ აღნიშნა.

კერძოდ, საქმე ეხება ტრამპის განცხადებას, რომლის თანახმად, ფრანგულ ღვინოსა და შამპანურზე 100%-იან ტარიფებს დააწესებს, თუ საფრანგეთი ამერიკულ ტექნოლოგიებზე ციფრულ გადასახადს არ გააუქმებს.

„ტარიფებს სარგებელი არავისთვის მოაქვს. ციფრული გადასახადი ევროპელების მიერ მიღებული გადაწყვეტილებაა. რამდენიმე ქვეყანამ აამოქმედა. ეს ჩვენი კანონმდებლობის ნაწილია“, - აღნიშნა მაკრონმა.

საფრანგეთის მიერ 2019 წელს ამოქმედებული ციფრული მომსახურების გადასახადი უმსხვილეს ტექნოლოგიურ კომპანიებზე ვრცელდება, როგორიც Meta, Amazon, Apple და Google-ია. საფრანგეთის საკონსტიტუციო სასამართლომ 2025 წელს ამერიკული კომპანია Airbnb-ისა და გერმანული Axel Springer-ის სარჩელის შემდეგ დაადგინა, რომ ციფრული მომსახურების გადასახადი კონსტიტუციურია.