სუს-ის ანტიკორუფციული სამსახურის მიერ, „საქართველოს რკინიგზის“ საქმეზე დაკავებული ერთ-ერთი პირის ადვოკატის, დიანა გვიშიანის განცხადებით, მისთვის უცნობია, თუ რას ედავებიან მისი დაცვის ქვეშ მყოფს.

როგორც გვიშიანი „ინტერპრესნიუსთან“ საუბარში აცხადებს, დაკავებულ 6 პირს ბრალს ოფიციალურად დღეს წაუყენებენ.

„ახლა უნდა მოვინახულო იზოლატორში, ჯერ ბრალის დადგენილება არ გადმოუციათ, ამ ეტაპისთვის ვერაფერს გეტყვით. რა თქმა უნდა, ჩვენთვის გაუგებარია, რასთან დაკავშირებითაა დაკავებული“, - განაცხადა გვიშიანმა.

ცნობისთვის, სუს-ის ანტიკორუფციულმა სამსახურმა სააქციო საზოგადოება „საქართველოს რკინიგზის“ ყოფილი გენერალური დირექტორი დავით ფერაძე და კიდევ 7 პირი სისხლისსამართლებრივ პასუხისგებაში მისცა. მათგან 2-ზე, მათ შორის დავით ფერაძეზე ძებნა გამოცხადდა, დანარჩენები კი თბილისში, მოსამართლის განჩინების საფუძველზე დააკავეს.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 ნაწილის „ა“ და „ბ“ ქვეპუნქტებით, მე-4 ნაწილის „ა“ ქვეპუნქტით, 194-ე მუხლის მე-3 ნაწილის „ა“ და „გ“ ქვეპუნქტებით, 210-ე მუხლის მე-2 ნაწილის „ა“ ქვეპუნქტით, ასევე, 25, 180-ე მუხლის მე-3 ნაწილის „ა“ და „ბ“ ქვეპუნქტებით, 25, 362-ე მუხლის მე-2 ნაწილის „ბ“ ქვეპუნქტით და 362-ე მუხლის მე-2 ნაწილის „ბ“ ქვეპუნქტით, რაც სასჯელის სახით ითვალისწინებს თავისუფლების აღკვეთას 9-დან 12 წლამდე ვადით.სახელმწიფო უსაფრთხოების სამსახურის ანტიკორუფციულ სააგენტოში გრძელდება აქტიური საგამოძიებო მოქმედებები ორგანიზებული ჯგუფის სხვა წევრების გამოვლენისა და მათ მიმართ კანონმდებლობით გათვალისწინებული ზომების განხორციელების მიზნით.

დავით ფერაძე სს "საქართველოს რკინიგზის“ გენერალური დირექტორის თანამდებობას 2017 წლის 22 ნოემბრიდან 2025 წლის 7 მაისამდე იკავებდა.