„ნაციონალური მოძრაობის“ პოლიტსაბჭოს თავმჯდომარის, ლევან ხაბეიშვილის ადვოკატის, ლაშა ტყეშელაძის განცხადებით, ხაბეიშვილი სასჯელაღსრულების დაწესებულებაში ევროსაბჭოს წამების ევროპული კომიტეტის (CPT) წარმომადგენლებმა მოინახულეს.

ადვოკატის ინფორმაციით, შეხვედრის დროს განხილვის მთავარი თემები იყო ხაბეიშვილის მიერ გაჟღერებული ბრალდებები მისი გატაცების, შესაძლო არასათანადო მოპყრობისა და, მისი შეფასებით, პოლიტიკურად მოტივირებული პატიმრობის შესახებ.

„დღეს, პოლიტპატიმარი ლევან ხაბეიშვილი მოინახულა ევროსაბჭოს წამების კომიტეტმა. ხაბეიშვილთან საუბარი შეეხო მის გატაცებას, წამებასა და პოლიტიკურად მოტივირებულ პატიმრობას.

წამებისა და არაადამიანური ან ღირსების შემლახველი მოპყრობის ან დასჯის პრევენციის ევროპული კომიტეტი, ევროსაბჭო დაინტერესებულია საქართველოში იყოს სამართლიანობა და ადამიანის უფლებები დაცული“,- აცხადებს ადვოკატი.