Reuters - ნავთობგადამამუშავებელ ქარხნებზე უკრაინული დარტყმების შემდეგ რუსეთი აზიიდან ბენზინის იმპორტს იწყებს
ნავთობგადამამუშავებელ ქარხნებზე უკრაინული დარტყმების შემდეგ რუსეთი აზიიდან ბენზინის იმპორტირებას იწყებს. ამის შესახებ ინფორმაციას Reuters-ი წყაროებზე დაყრდნობით ავრცელებს.
გამოცემა აღნიშნავს, რომ რუსეთი დიდი ხნის განმავლობაში პირველად დაიწყებს ბენზინის საზღვაო გზით იმპორტირებას, რათა ნავთობგადამამუშავებელ ქარხნებზე უკრაინული დარტყმების შედეგად გაჩენილი დეფიციტი აანაზღაუროს.
Reuters-ის ცნობით, ბენზინი რუსეთის ერთ-ერთ დასავლეთ პორტში უნდა მიიტანონ აზიის ქვეყნიდან. წყაროებმა არ დააზუსტეს კონკრეტულად რომელი ქვეყნიდან იქნება ბენზინი. გასულ წელს, ნავთობგადამამუშავებელ ქარხნებზე დარტყმების შემდეგ, რუსეთის ხელისუფლება ბენზინის ჩინეთში, სინგაპურსა და სამხრეთ კორეაში შეძენას განიხილავდა.
გამოცემა აღნიშნავს, რომ რუსეთმა ასევე მნიშვნელოვნად გაზარდა საწვავის ბელარუსიდან იმპორტი. მოსკოვმა ასევე ბენზინი მოსთხოვა ყაზახეთს, მაგრამ არც ბელარუსს და არც ყაზახეთს არ გააჩნია საკმარისი სიმძლავრეები, რათა საგრძნობლად შეავსონ რუსული ბაზარი.
