ისრაელის საგარეო საქმეთა მინისტრის გიდეონ საარის განცხადებით, ევროკავშირის უმაღლეს წარმომადგენელთან საგარეო საქმეთა და უსაფრთხოების პოლიტიკის საკითხებში კაია კალასთან კონტაქტებს წყვეტს.

„ქალბატონი კაია კალასი, უკვე გარკვეული პერიოდია ისრაელის მიმართ უსამართლობას იჩენს. ცოტა ხნის წინ გავრცელდა ინფორმაცია, რომ მან მექსიკაში ვიზიტის დროს ისრაელი სამხრეთ აფრიკის რასისტულ აპართეიდის რეჟიმს შეადარა”, - წერს ისრაელის საგარეო საქმეთა მინისტრი გიდეონ საარი სოციალურ ქსელში.

გამოცემა Euractiv-ის ცნობით, ევროკავშირის უმაღლესმა წარმომადგენელმა, კაია კალასმა აღნიშნული შედარება გასულ თვეში მექსიკაში, მაღალი დონის მოლაპარაკებების დროს გააკეთა.

გიდეონ საარის თქმით, კაია კალასს გავრცელებული ინფორმაციის უარყოფის მიზნით განცხადება ამ დრომდე არ გაუვრცელებია.

„ამიტომ, როგორც ისრაელის სახელმწიფოს საგარეო საქმეთა მინისტრს, მე სხვა გზა არ მაქვს გარდა იმისა, რომ გავწყვიტო ყველანაირი კონტაქტი ქალბატონ კალასთან, ვიდრე არ უარყოფს ამ სისხლიან ცილისწამებას, რომელიც მან მსოფლიოში ერთადერთი ებრაული სახელმწიფოს და ახლო აღმოსავლეთში ერთადერთი დემოკრატიის მისამართით გამოიყენა“, - აღნიშნა ისრაელის საგარეო საქმეთა მინისტრმა.