19 ივნისიდან მდინარე იორის აუზში მოსალოდნელია წყლის ნაკადის მატება, რაც უხვმა ნალექმა გამოიწვია. ამის შესახებ ინფორმაციას სოფლის მეურნეობისა და გარემოს დაცვის სამინისტრო ავრცელებს.

უწყება მოქალაქეებს სიფრთხილისკენ მოუწოდებს.

„შპს „საქართველოს მელიორაცია“ გაცნობებთ, რომ 2026 წლის 19 ივნისიდან მდინარე იორის აუზში მოსალოდნელია წყლის ნაკადის მატება, რაც უხვმა ნალექმა გამოიწვია.

მდინარე იორს ახასიათებს სეზონური წყალმოვარდნები. უხვმა ნალექმა შესაძლოა გავლენა მოახდინოს სარწყავი არხების გამტარუნარიანობაზე, მდინარის მიმდებარედ არსებულ გზებზე, სასოფლო-სამეურნეო დანიშნულების მიწებსა და საძოვრებზე.

უსაფრთხოების ნორმების დაცვისა და შესაძლო საფრთხეების თავიდან არიდების მიზნით, შპს „საქართველოს მელიორაცია“ საგარეჯოს, გურჯაანის, დედოფლისწყაროსა და თიანეთის მუნიციპალიტეტების მოსახლეობას მდინარის, მაგისტრალური არხებისა და ჰიდროტექნიკური ნაგებობების მიმდებარე ტერიტორიებზე გადაადგილებისას განსაკუთრებული სიფრთხილისკენ მოუწოდებს. გთხოვთ, გაითვალისწინოთ არსებული ვითარება და დაიცვათ უსაფრთხოების წესები, რათა თავიდან ავიცილოთ უბედური შემთხვევები და არასასურველი სირთულეები“,- ნათქვამია ინფორმაციაში.