ელენე ხოშტარიას მიმართ რეჟიმი ციხეში ახორციელებს არაადამიანურ მოპყრობას, მას არ მიეწოდება შესაბამისისი ისამედიცინო მომსახურება. მნიშვნელოვანია დაუყოვნებლივ მოხდეს ელენესთვის შესაბამისი სამედიცინო კვლევების ჩატარება და დაუყოვნებლივი გათავისუფლება, - ეს განცხადება „კოალიცია ცვლილებისთვის“ წევრმა, მარიკა არევაძემ ქალ პოლიტიკოსებთან ერთად, რუსთავის მე-5 პენიტენციურ დაწესებულებასთან გააკეთა, სადაც სასჯელს იხდის „დროას“ ლიდერი, ელენე ხოშტარია.

როგორც არევაძემ აღნიშნა, ელენე ხოშტარია ციხეში აბსურდული ბრალდებით ზის.

„ელენე ხოშტარია არის პირველი ქალი პოლიტიკოსი, რომელიც რეჟიმმა სრულიად უსაფუძვლოდ, აბსურდული ბრალის ფარგლებში აქცია პოლიტიკურ პატიმრად და გარდა იმისა, რომ ის აბსურდული ბრალის, ფლომასტერით ბანერზე გაკეთებული წარწერის გამო, სრულიად უსამართლოდ ზის ციხეში, ის, ასევე, რეჟიმმა დააქვემდებარა არაადამიანურ მოპყრობას, ვინაიდან ელენეს არ მიწოდება შესაბამისის სამედიცინო მომსახურება. მნიშვნელოვანია დაუყოვნებლივ მოხდეს ელენესთვის შესაბამისი სამედიცინო კვლევების ჩატარება და მოხდეს მისი დაუყოვნებლივი გათავისუფლება. ეს შედეგი აუცილებლად დადგება და ჩვენ ვიბრძოლებთ იქამდე, ვიდრე ეს არ მოხდება“, - განაცხადა მარიკა არევაძემ.

შეგახსენებთ, კახა კალაძის საარჩევნო ბანერის დაზიანებაში ბრალდებული პოლიტიკოსი, “დროას” ლიდერი, ელენე ხოშტარია სასამართლომ დამნაშავედ ცნო. მოსამართლე გიორგი არევაძის განაჩენით, ელენე ხოშტარიას 1 წლითა და 6 თვის ვადით თავისუფლების აღკვეთა მიესაჯა. რამდენიმე დღის წინ მისმა ადვოკატებმა გაავრცელეს ინფორმაცია, რომ ელენე ხოშტარიას ჯანმრთელობის პრობლემები აქვს, მათ შორის დამოუკიდებლად გადაადგილება უჭირს და ამისთვის ხელჯოხის გამოყენება ესაჭიროება.