სახალხო დამცველის მოადგილე ელენე ღუდუშაური და პრევენციის ეროვნული მექანიზმის თანამშრომლები საქართველოში ვიზიტით მყოფ წამების პრევენციის ევროპული კომიტეტის (CPT) დელეგაციის წევრებს ბორის ვოდცს, ტერეზ რიტერს და ნიკოლა კოვაჩევიჩს შეხვდნენ. ამის შესახებ ინფორმაციას სახალხო დამცველის აპარატი ავრცელებს.

მათივე ცნობით, შეხვედრის მონაწილეებმა საქართველოში დაკავებისა და თავისუფლების შეზღუდვის სხვა ადგილებში ადამიანის უფლებათა დაცვის მდგომარეობა განიხილეს და დელეგაციის წევრებს მიაწოდეს ინფორმაცია არასათანადო მოპყრობის შემთხვევების, შესაბამის რისკფაქტორების და საკანონმდებლო ხარვეზების თაობაზე.

ასევე, განსაკუთრებული ყურადღება გამახვილდა პატიმართა უფლებრივ მდგომარეობასა და პენიტენციურ დაწესებულებებში არსებული გამოწვევების შესახებ.