რადიკალური მემარცხენეები და „დემოკრატები“ აცნობიერებენ, რამდენად წარმატებულად წარვმართეთ ომი ირანის წინააღმდეგ, რის შედეგადაც ეს ქვეყანა სამხედრო თვალსაზრისით სრულად დამარცხდა, - ამის შესახებ აშშ-ის პრეზიდენტი დონალდ ტრამპი სოციალურ პლატფორმა Truth Social-ზე წერს.

ტრამპის მტკიცებით, ირანი 47 წლის განმავლობაში ყველაფერს დაუსჯელად აკეთებდა და ეს მოცემულობა მხოლოდ მას შემდეგ შეიცვალა, რაც ის პრეზიდენტი გახდა.

„ობამა მხოლოდ მილიარდობით დოლარს აძლევდა მათ ნაღდი ფულის სახით და არასოდეს გამოიყენა ჩვენი მაშინ უკვე დასუსტებული სამხედრო ძალა იმისთვის, რაც უნდა გაკეთებულიყო - მსოფლიოს ტერორიზმის ნომერ პირველი სპონსორის, ირანის, გასაკონტროლებლად. მათ მის მიმართ არანაირი პატივისცემა არ ჰქონდათ. მათ მიაჩნდათ, რომ ის, ისევე როგორც მძინარა ჯო ბაიდენი, სუსტი და არაეფექტიანი ლიდერი იყო და ამაში 100%-ით მართლები იყვნენ.

ირანი 47 წლის განმავლობაში დაუსჯელად სჩადიოდა მკვლელობებს, ვიდრე მე არ მოვედი. შემდეგ ყველაფერი შეიცვალა. ამერიკა დაბრუნდა!“ - აცხადებს ტრამპი.