ალერგიისა და იმუნოლოგიის ცენტრი საქმიანობას ახალ მისამართზე ახალი სახელწოდებით აგრძელებს. გოთუას სამედიცინო ცენტრი, რომელიც უკვე ოფიციალურად გ.ჟვანიას #2-ში გაიხსნა, ალერგიისა და იმუნოლოგიის ცენტრის მრავალწლიანი საქმიანობისა და განვითარების ახალი ეტაპია.

როგორც კლინიკაში აცხადებენ, წლების განმავლობაში დაგროვებული გამოცდილება, პაციენტებთან ნდობაზე დაფუძნებული ურთიერთობა და სამედიცინო სფეროში მიღწეული შედეგები საფუძვლად დაედო ახალ სახელწოდებას, რომელიც პატივს სცემს წარსულს და ამავდროულად გამოხატავს სამომავლო ხედვას.

„მსოფლიო ტენდენციები ალერგოლოგიასა და კლინიკური იმუნოლოგიის მიმართულებით გვკარნახობს მულტიდისციპლინურ, ინტეგრირებულ მიდგომას. სწორედ ამ პრინციპს ეფუძნება გოთუას სამედიცინო ცენტრის ხედვა. ცენტრი აერთიანებს სხვადასხვა სპეციალობის ექიმებს, თანამედროვე სამედიცინო მიდგომებსა და საერთაშორისო პროფესიულ თანამშრომლობას, რათა პაციენტს შევთავაზოთ დიაგნოსტიკისა და მკურნალობის ის სტანდარტები, რომელიც მსოფლიო სამედიცინო პრაქტიკას შეესაბამება. ახალი ცენტრი ძველი ცენტრის ბაზარზე გაიხსნა. ჩვენ, რა თქმა უნდა, ვაგრძელებთ ალერგიისა და იმუნოლოგიის მიმართულებით პაციეტების მიღებას და ამას ემატება ახალი მიმართულებები. ვიწყებთ იმ მომიჯნავე დარგების განვითარებასაც, რომლებიც ახლოს არის ალერგია-იმუნოლოგიასთან. ჩვენი მიზანია, პაციენტებს უფრო მეტი შესაძლებლობა მივცეთ სხვადასხვა დაავადების სამკურნალოდ,“ - აცხადებს გოთუას სამედიცინო ცენტრის გენერალური დირექტორი მაია გოთუა.

27 წლის განმავლობაში დაგროვებულმა კლინიკურმა გამოცდილებამ და უწყვეტმა პროფესიულმა განვითარებამ ცენტრი რეგიონის ერთ-ერთ წამყვან და რეფერენსულ დაწესებულებად აქცია. დღეს იქ მკურნალობას გადიან არა მხოლოდ საქართველოს, არამედ მეზობელი ქვეყნების პაციენტებიც, რაც დიდ პროფესიონალიზმზე მიუთითებს.

„საქართველოს შეემატა კიდევ ერთი მულტიდისციპლინური ცენტრი. ჩვენი ქვეყნისთვის ეს ძალიან მნიშვნელოვანი საკითხია. ალერგოლოგია ძალიან ბევრ მომიჯნავე და ახლოს მდგომ დარგს კვეთს. ახალი ცენტრის კონცეფციაც სწორედ იმას გულისხმობს, რომ ალერგიასთან დაკავშირებული ყველა მონათესავე მიმართულება ერთ სივრცეში იყოს ხელმისაწვდომი. ვამაყობთ, რომ სწორედ ჩვენი დარგია ის სამედიცინო მიმართულება, რომლის პაციენტებიც ყველაზე ნაკლებად გაედინებიან ქვეყნიდან საზღვარგარეთ დაავადების დიაგნოსტიკისა თუ მკურნალობისთვის,“ - აღნიშნავს გოთუას სამედიცინო ცენტრის კლინიკური დირექტორი ბიძინა კულუმბეგოვი.

ახალი სამედიცინო ცენტრის გახსნას დაესწრნენ საქართველოს ჯანდაცვის მინისტრი მიხეილ სარჯველაძე, სამედიცინო სფეროს წამყვანი ექსპერტები, დარგის სპეციალისტები, პარტნიორი ორგანიზაციებისა და მედიის წარმომადგენლები, ასევე მოწვეული სტუმრები.

(R)