ლევან ხაბეიშვილმა ფარ-ხმალი დაყარა და სავარაუდოდ, ცდილობს, რომ „ნაციონალური მოძრაობის“ და კოლექტიური ოპოზიციის რადიკალურ დღის წესრიგს რაღაცნაირად გაემიჯნოს, - ამის შესახებ „ქართული ოცნების“ დეპუტატმა, ლევან მაჭავარიანმა ჟურნალისტებთან განაცხადა.

მისივე თქმით, როგორ ჩანს, ლევან ხაბეიშვილმა „სიმართლეს თვალი გაუსწორა და გამოფხიზლდა“.

„წერილში ბევრი რამ არის, რასაც კატეგორიულად არ ვეთანხმები და აბსურდია. არის რაღაცები, რაც ლოგიკურია. ეს რაღაცები, რაზეც ვამბობ რომ ლოგიკურია, არის ზუსტად ის, რაზეც „ქართული ოცნება“ ვსაუბრობთ და ზუსტად ის, რითაც „ქართული ოცნება“ ვმოქმედებთ. ბატონმა ხაბეიშვილმა კარგად გაიაზრა, რომ აზრი აღარ აქვს ამ აბსურდში ცხოვრებას და სავარაუდოდ, ცდილობს რეალობას თვალი გაუსწოროს. შესაბამისად, ამ შემთხვევაში, იგი უნდა დათანხმდეს იმ ხაზს, რასაც „ქართული ოცნება“ მიჰყვება და უნდა თქვას, რომ ჩვენი ხაზი არის უალტერნატივო - ჩვენი პოლიტიკა, როგორც საგარეო, ისე საშინაო. შესაბამისად, მის წერილში თანხვედრები მოხდებოდა ჩვენა პოლიტიკასთან დაკავშირებით. მან ისიც კარგად გაიაზრა, სავარაუდოდ, რომ არჩევნები „ქართულმა ოცნებამ" მოვიგეთ ჩვენი ეროვნული პოლიტიკით და ჩვენი მოქალაქეების დაკვეთის შესრულებით. ფარ-ხმალი დაყარა და სავარაუდოდ, ცდილობს, რომ „ნაციონალური მოძრაობის" და კოლექტიური ოპოზიციის რადიკალურ დღის წესრიგს რაღაცნაირად გაემიჯნოს. შევხედოთ როგორ განვითარდება მოვლენები და გააგრძელებს თუ არა იგი ამ მესიჯბოქსს, რაც ჯამურად აქვს კოლექტიურ "ნაციონალურ მოძრაობას," - განაცხადა მაჭავარიანმა.

ცნობისთვის, „ნაციონალური მოძრაობის“ პოლიტსაბჭოს თავმჯდომარე ლევან ხაბეიშვილი საზოგადოებას 5+1 შეთანხმებას სთავაზობს. უფრო კონკრეტულად, როგორც პატიმრობაში მყოფი ხაბეიშვილის „ფეისბუქზე“ გავრცელებულ მის მიმართვაშია აღნიშნული, უნდა მოხდეს შეთანხმება 5 საკითხზე, რასთან დაკავშირებითაც „პროპაგანდას პასუხი უნდა გასცენ“. დამატებით ერთ საკითხად კი ლევან ხაბეიშვილი ასახელებს „საქართველოს ივანიშვილის გარეშე“.