რამდენიმე დღეა ინტენსიურად ვავრცელებ ინფორმაციას, რომ კრემლის მიერ ფორსირებული ქმედებები ცხინვალთან დაკავშირებით არის საგანგაშო, გაზრდილია ჩვენი ოკუპირებული ტერიტორიების ანექსიის საფრთხე - ამის ნათელი მაგალითია დღეს რუსეთის პრეზიდენტის შეხვედრა სეპარატისტთა ლიდერთან ალან გაგლოევთან, სადაც 9 მაისის ხელშეკრულების გაძლიერება და მის ფარგლებში კოორდინაციის გაფართოება განიხილეს, რაც სახიფათოა ხელშეკრულებაში მითითებული გარკვეული პუნქტებიდან გამომდინარე, - ამის შესახებ პარტია „ევროპელი დემოკრატების“ თავმჯდომარემ პაატა დავითაიამ განაცხადა.

პაატა დავითაიას გამარტებით, 9 მაისის ხელშეკრულება მოიცავს ნორმას, რომლის მიხედვით რუსეთის თვითმმართველობის ორგანოების გადაწყვეტილებები მოქმედებს ცხინვალის რეგიონში, რაც სრული აბსურდია, ეს ცხადყოფს, რომ საუბარია არა ურთიერთობებზე ცხინვალსა და მოსკოვს შორის, არამედ ცხინვალის ტერიტორიის სრულ ინტეგრაციაზე მოსკოვთან, რაც ანექსიის ნიშანია.

„კატეგორიულად მიუღებელია, ის სიჩუმე, რასაც საქართველოს ხელისუფლება მოსკოვის ნაბიჯებთან დაკავშირებით იჩენს. მოვუწოდებ საქართველოს მთავრობას, გაკეთდეს მკაცრი განცხადებები და გადაიდგას მკვეთრი ნაბიჯები, გამოცხადდეს ძებნა სეპარატისტთა ლიდერებზე, რაც სამომავლოდ გახდება საფუძველი სამართლებრივი ნორმისა, რომლის მიხედვითაც ანულირებული იქნება ძებნილი პირების მიერ გაკეთებული ხელმოწერა ნებისმიერ ოფიციალურ დოკუმენტზე.

ჩვენ ყველაფერი უნდა გავაკეთოთ იმისათვის, რომ თავიდან ავირიდოთ მოსალოდნელი საფრთხე. ახლა საჭიროა მეტად აქტიური თანამშრომლობა ჩვენს პარტნიორებთან და არა მათი კრიტიკა და დაპირისპირება, პირიქით საქმის კურსში უნდა ჩავაყენოთ ისინი იმ საფრთხეების შესახებ, რაც დაკავშირებულია კრემლში გამართულ შეხვედრებთან, რათა იმ პირობებში, როდესაც მზადდება ჩვენი ტერიტორიების ანექსია, არ დავრჩეთ რუსეთის პირისპირ მარტო, პარტნიორების გარეშე“,- აცხადებს პაატა დავითაია.