ირანის საგარეო საქმეთა სამინისტროს პრესსპიკერის, ესმაილ ბაღაის განცხადებით, თეირანს ატომური ენერგიის საერთაშორისო სააგენტოს ინსპექტორებთან დაკავშირებით ახალი ვალდებულებები არ აუღია, - ინფორმაციას BBC-ი ავრცელებს.

ირანის საგარეო საქმეთა სამინისტროს წარმომადგენლის განცხადებით, გაეროს ინსპექტორებთან ნებისმიერი ურთიერთობა პარლამენტისა და ეროვნული უშიშროების უმაღლესი საბჭოს მიერ დადგენილი არსებული პროცედურების შესაბამისად განხორციელდება.

აშშ-ის ვიცე-პრეზიდენტმა ჯეი დი ვენსმა განაცხადა, რომ ირანი ატომური ენერგიის საერთაშორისო სააგენტოს ინსპექტორებს ქვეყანაში დაბრუნების უფლებას მისცემს. შვეიცარიაში გამართული მოლაპარაკებების შემდეგ, ვენსმა განაცხადა, რომ საერთაშორისო ატომური ენერგიის სააგენტოსთან მოლაპარაკებები შესაძლოა დღესვე დაიწყოს. ამასთან, აშშ-ის პრეზიდენტმა დონალდ ტრამპმა სოციალურ ქსელში დაწერა, რომ ირანი „დათანხმდება იარაღის მასშტაბური შემოწმების ჩატარებას“.