„ბიბლუსმა“ შვეიცარიაში, ქალაქ ბაზელში, ქართული საბავშვო სამკითხველო კუთხე გახსნა. საგანმანათლებლო სივრცე ბავშვებისა და ახალგაზრდების ინტერკულტურულ ბიბლიოთეკაში (JUKIBU Interkulturelle Bibliothek für Kinder und Jugendliche), ბაზელში მოქმედ ქართულ საკვირაო სკოლა „ნაკადულთან“ პარტნიორობით მოეწყო. ახალი სამკითხველო კუთხე უმნიშვნელოვანესი შენაძენია როგორც უშუალოდ საკვირაო სკოლის მოსწავლეებისთვის, ისე ამ ქალაქში მცხოვრები სხვა ქართველი ბავშვებისთვის, რაც მათ მშობლიურ ენასა და ლიტერატურასთან კავშირის შენარჩუნებაში დაეხმარება.

აღნიშნული ინიციატივა წიგნიერების გამავრცელებელი საზოგადოების პროექტების ფარგლებში განხორციელდა. ეს ორგანიზაცია 2024 წელს „ბიბლუსის“ გენერალურმა დირექტორმა ირაკლი გაგნიძემ და მწერალმა გიორგი კეკელიძემ ერთობლივად დააფუძნეს. საზოგადოება, რომლის თავმჯდომარეც გიორგი კეკელიძეა, აგრძელებს იმ საგანმანათლებლო მოძრაობის საქმეს, რომელსაც საფუძველი ჯერ კიდევ 2012 წელს ჩაეყარა.

ორგანიზაციის უმთავრეს მიზანს საქართველოს ქალაქებსა და სოფლებში არსებული სკოლებისა და ბიბლიოთეკების წიგნებითა და კომპიუტერული ტექნიკით მომარაგება წარმოადგენს. ამასთან ერთად, საზოგადოება აქტიურად ემსახურება საზღვარგარეთ ქართული წიგნის კუთხეების მოწყობას, მართავს ლექცია-სემინარებსა და საგანმანათლებლო პროექტებს. საზღვარგარეთ მსგავსი ქართული ბიბლიოთეკებისა და კუთხეების მხარდამჭერი კი „საქართველოს ბანკია“, რომელიც ორგანიზაციას საერთაშორისო პროექტების განხორციელებაში ეხმარება.

(R)