როგორ საუბრობთ „ნაცებზე“? თქვენი ბელადი არ იყო პრემიერ-მინისტრობის თანამდებობიდან რომ გადადგა „ნაცმოძრაობის“ დამნაშავე თავმჯდომარე, ნიკა მელიას გადასარჩენად? - თუ დაგვავიწყდა, რომ თქვენი ბელადი გიორგი გახარია და მიხეილ სააკაშვილი ერთსა და იმავე დღეს ერთსა და იმავე სასტუმროში „სრულიად შემთხვევით“ აღმოჩნდნენ? - ასე მიმართა პარლამენტის იურიდიულ საკითხთა კომიტეტის თავმჯდომარემ პარტია „გახარია საქართველოსთვის“ დეპუტატებს პლენარულ სხდომაზე.

„შეუძლებელია ხოლმე, რომ კოლექტიური „ნაციონალური მოძრაობის“ საპარლამენტო ფრთის, „გახარიელების“ გამოსვლას არ გამოეხმაუროს ადამიანი. ამ ადამიანებმა რაც შეიძლება მეტი უნდა ისაუბრონ და თავიანთი არაკომპეტენტურობა და ყველაფერზე ხელმომწერობა რომ დაადასტურონ. „გახარიელი“ რომ საუბრობს, როგორ შეიძლება სიტყვისა და გამოხატვის თავისუფლება შეიზღუდოს და თავისუფალ გამოსვლებზე სახელმწიფოს რეაგირება ჰქონდესო... ესენი იმ ძალის წარმომადგენლები არიან, რომლის ბელადიც ბრალდებულია დემონსტრანტების მიმართ არაპროპორციული ძალის გამოყენებაში, და ამასთან დაკავშირებით გულზე მჯიღის სცემით იმეორებდა, რომ ყველაფერზე მე ვარ პასუხისმგებელიო და როდესაც პასუხისმგებლობამ მას მიაკითხა ადგა და ერთ-ერთი ცხოველივით უცხოეთში გაიქცა“, - განაცხადა არჩილ გორდულაძემ.

ამავე გამოსვლაში გორდულაძემ აღნიშნა, რომ საპარლამენტო ფრაქცია „საქართველოსთვის“ დეპუტატებმა „ნაცები“ გვერდით სკამებზე უნდა მოიკითხონ.

„როგორ საუბრობთ „ნაცებზე“? თქვენი ბელადი არ იყო პრემიერ-მინისტრობის თანამდებობიდან რომ გადადგა „ნაცმოძრაობის“ დამნაშავე თავმჯდომარე, ნიკა მელიას გადასარჩენად? მანამდე საუბრობდა, რომ თურმე ერთ-ერთი ქვეყნის ელჩთან წინასწარი კონსულტაციები ჰქონდა გამართული. სახელმწიფო ინსტიტუტების დასასუსტებლად იყო ეს ნაბიჯი გადადგმული და სახელმწიფო დადგა თავის სიმაღლეზე და კონკრეტული დამნაშავე პასუხისგებაში მიეცა. „ნაცები“ მოიკითხეთ გვერდით, თქვენს გვერდით სკამებზე სხედან! აღარაფერს ვამბობ ადეიშვილის მოადგილეზე, რომელიც თბილისის საკრებულოში ოთხი წლის განმავლობაში გყავდათ და ოთხ მუნიციპალიტეტში თანაცხოვრობდით. ყველა შეტევის მონაწილე ხართ სახელმწიფოს მიმართ. თქვენ ის ადამიანები ხართ, რომლებიც ბედავენ და კანონის უზენაესობასა და დემოკრატიულ უკუსვლაზე საუბრობენ. ეს ის ტერმინოლოგიაა, რომელიც გარე ძალებმა დაამკვიდრეს 2019 წლიდან მონატრებული და საინტერესოა, ამ დემოკრატიულ უკუსვლას თქვენი ბელადი რომ პრემიერი იყო, ეთანხმებოდა?“- განაცხადა გორდულაძემ.

გორდულაძის თქმით, პარტია „გახარია საქართველოსთვის“ მიერ გადადგმული ყველა ნაბიჯი ადასტურებს რამდენად არაკომპეტენტურები არიან.“

„თქვენ ის ადამიანები ხართ, რომლებიც ეთანხმებოდით და ეთანხმებით კანდიდატის სტატუსის საქართველოსთვის არმინიჭებას, იმეორებთ „ნაცურ“ ნარატივს გაბრაზებულ ხალხთან დაკავშირებით, ემხრობით თავისუფალ სიტყვაზე თავდასხმას, არ ემიჯნებით და არ გმობთ ხელისუფლების ძალადობრივი გზით დამხობის მცდელობებს, 4 ოქტომბერთან დაკავშირებით, მოღალატეობრივ წერილებს აგზავნით უცხოეთში ქვეყნისა და საზოგადოების დასაზიანებლად, სრულ თანხვედრაში ხარტ და წარმოადგენთ კოლექტიურ „ნაცებს“. თუ დაგვავიწყდა, რომ თქვენი ბელადი გიორგი გახარია და მიხეილ სააკაშვილი ერთსა და იმავე დღეს ერთსა და იმავე სასტუმროში „სრულიად შემთხვევით“ აღმოჩნდნენ? შემდეგ თავის მართლება მოგიწიათ. ყველა თქვენი გადადგმული ნაბიჯი ადასტურებს რამდენად არაკომპეტენტურები ხართ...

არაკომპეტენტურობა, ამ ქვეყნის ღალატი, საზოგადოებაზე თავდასხმა, პათეტიკური განცხადებები არ გიშველით, რადგან ერთი განულებული პარტიის წარმომადგენლები ხართ და კეთილი ინებეთ და საზოგადოების სახელით საუბარს თავი დაანებეთ“, - განაცხადა გორდულაძემ.