2025 წელს უცვლელი იყო დროებითი საცხოვრებლით უზრუნველყოფისათვის დადგენილი 300-ლარიანი ლიმიტი, რომლის გადახედვაც ჯერ კიდევ 2024 წელს იგეგმებოდა. ამის შესახებ სახალხო დამცველის ანგარიშშია ნათქვამი, რომელიც ლევან იოსელიანმა პარლამენტში წარადგინა.

საქართველოს პარლამენტში, პლენარულ სესიაზე გამოსვლისას სახალხო დამცველმა, ლევან იოსელიანმა, უსახლკარო პირთა უფლებების დაცვის მიმართულებით არსებულ გამოწვევებზე ისაუბრა და არაერთ სოციალურ საცხოვრისსა და მსგავსი ტიპის შენობებში არსებული უკიდურესად მძიმე, ჯანმრთელობისა და სიცოცხლისთვის საფრთხის შემცველი მდგომარეობა მიმოიხილა.

მათი ცნობით, უსაფრთხო და ღირსეული საცხოვრებელი გარემოს უზრუნველყოფა მნიშვნელოვან გამოწვევად რჩება სხვა მოწყვლადი ჯგუფებისთვისაც. ამ მხრივ, განსაკუთრებულ ყურადღებას ეკომიგრანტთა უფლებრივი მდგომარეობა საჭიროებს, რომელთა საცხოვრებლის საკითხი პირდაპირ არის დაკავშირებული სტიქიური პროცესებისგან გამოწვეულ რისკებთან და სახელმწიფოს მიერ გატარებული პრევენციული ღონისძიებების ეფექტიანობასთან.

„კვლავ არ გაზრდილა დაზარალებული ოჯახებისთვის საცხოვრებლის შესასყიდად განსაზღვრული ფინანსური ლიმიტი, რაც საცხოვრებელი უძრავი ქონების ფასების ზრდის პირობებში, აფერხებს ეკომიგრანტი ოჯახების დროული და ეფექტიანი განსახლების პროცესს.

უსაფრთხო და ღირსეული საცხოვრებლით უზრუნველყოფის საკითხი გამოწვევად რჩება იძულებით გადაადგილებული სხვა ჯგუფებისთვისაც. განსაკუთრებით აქტუალურია დევნილთა სათანადო საცხოვრებლით უზრუნველყოფის საკითხი.

2025 წლის ბოლო მონაცემებით, საქართველოში 300 492 იძულებით გადაადგილებული პირი და 97 280 დევნილი ოჯახია რეგისტრირებული. მათგან, 45 160 ოჯახი ჯერაც არ არის დაკმაყოფილებული გრძელვადიანი საცხოვრებლით.

მნიშვნელოვანია, რომ საანგარიშო წელს გაიზარდა გრძელვადიანად განსახლებული ოჯახების რიცხვი და 4 636 შეადგინა ასევე სიცოცხლისა და ჯანმრთელობისათვის მომეტებული საფრთხის შემცველი 6 შენობა გამოთავისუფლდა.

თუმცა, სახელმწიფოს მხრიდან გადადგმული ნაბიჯების მიუხედავად, საბოლოო ჯამში, წლიდან წლამდე მნიშვნელოვნად არ იცვლება საცხოვრებლით უზრუნველყოფილი ოჯახების რაოდენობა და დევნილთა მნიშვნელოვანი ნაწილი უკვე 30 წელზე მეტია ცხოვრობს დროებით, არასტაბილურ ან საცხოვრებლად უვარგის პირობებში.

საანგარიშო წელს, უცვლელი იყო დროებითი საცხოვრებლით უზრუნველყოფისათვის დადგენილი 300 ლარიანი ლიმიტი, რომლის გადახედვაც ჯერ კიდევ 2024 წელს იგეგმებოდა“,- ნათქვამია სახალხო დამცველის აპარატის მიერ გავრცელებულ ინფორმაციაში.