გია ვოლსკი - მიჩნდება ეჭვი, რომ არსებობენ ადამიანები, ვინც დაინტერესებული არიან, ევროკავშირსა და საქართველოს შორის წითელი ხაზი გაჩნდეს და რუსეთს მიეცეს საშუალება, თავისი პოლიტიკა გაატაროს - სანქციები კი იგივეა, საქართველო ჩააგდო ნგრევის შეუქცევად პროცესში
მიჩნდება ეჭვი, რომ არსებობენ ადამიანები, ვინც დაინტერესებული არიან იმით, რომ ევროკავშირსა და საქართველოს შორის გაჩნდეს გარკვეული წითელი ხაზი და ამავე დროს, რუსეთს მიეცეს საშუალება, თავისი პოლიტიკა გაატაროს - რუსეთის ინტერესების სასარგებლოდ ყოველთვის მოქმედებდა „ნაცმოძრაობა", - ამის შესახებ პარლამენტის პირველმა ვიცე-სპიკერმა, გია ვოლსკიმ ჟურნალისტებთან განაცხადა.
მისივე თქმით, „არის სერიოზული კონსპირაცია, ანტიქართული გაერთიანება, რომელიც ოკუპანტს ყველა მიმართულებით უწყობდა ხელს და დღესაც ამას აკეთებს".
„ქვეყნის საწინააღმდეგოა საფუძვლის არარსებობის გარეშე წარმართული პროპაგანდა, რომ თურმე, ირანს და ჩინეთს ვუკავშირდებით და ამიტომაცაა, რომ ევროკავშირი საქართველოს ინტერესებს არ იცავს - არის ის პროპაგანდა, რომელიც არანაკლებ დამაზიანებელი და მავნებლურია, ვიდრე ის, რასაც იუკნევიჩიენე ეწევა საქართველოს წინააღმდეგ. მე მიჩნდება ეჭვი, რომ არსებობენ ადამიანები, ვინც დაინტერესებულია იმით, რომ ევროკავშირსა და საქართველოს შორის გაჩნდეს გარკვეული წითელი ხაზი და ამავე დროს, რუსეთს მიეცეს საშუალება, თავისი პოლიტიკა გაატაროს. არც ამას გამოვრიცხავთ, იმიტომ რომ რუსეთის ინტერესების სასარგებლოდ ყოველთვის მოქმედებდა „ნაცმოძრაობა", მიუხედავად თავისი რიტორიკისა ხელისუფლებაში ყოფნის დროს. „ნაცმოძრაობას" ყოველთვის უჭერდა მხარს ის გაერთიანება, რასაც ჰქვია „ევროპული სახალხო პარტია". ეს არის რეალობა და ამას ვადევნებთ თვალ-ყურს. არის სერიოზული კონსპირაცია, ანტიქართული გაერთიანება, რომელიც ოკუპანტს ყველა მიმართულებით უწყობდა ხელს და დღესაც ამას აკეთებს. იმედს ვიტოვებთ, ამას შეუგნებლად აკეთებენ და ადრე თუ გვიან, გამოფხიზლდებიან და შეხედავენ, რეალურად, რა ხდება. საქართველოს ხელისუფლებას ეძახიან პრო-რუსულს და ამ დროს, არც ერთი ნაბიჯი არ გადაუდგამთ ისეთი, სადაც რუსეთს არ ექნებოდა უპირატესობა საქართველოსთან მიმართებით. სანქციებიც მესმის, მაგრამ ეს იგივეა, საქართველო ჩააგდო ნგრევის შეუქცევად პროცესში. ამ რეალობას რომ შეხედავ მიხვდები, რომ საქართველოში შენი ოპონენტებიც და მათი მედიასაშუალებებიც მოქმედებენ ეროვნული ინტერესების საწინააღმდეგოდ და რუსეთს საშუალებას აძლევენ განავითაროს თავისი პოლიტიკა. ეს არის ორჯერ ორი. ამ საკითხს სხვა განმარტება არ გააჩნია," - განაცხადა ვოლსკიმ
