ჩვენი მიზანი უნდა იყოს, რომ ხელი შევუწყოთ დემოკრატიული პროგრესისთვის პირობების შექმნას - დაბალანსებულ მიდგომას მივესალმები, - ამის შესახებ ევროსაბჭოს საპარლამენტო ასამბლეაში არმენ გევორგიანმა საქართველოს შესახებ დებატებზე სიტყვით გამოსვლისას განაცხადა.

„საქართველოში არსებული ვითარება ჩვენს ყურადღებას მოითხოვს. ჩვენ არ შეგვიძლია უყურადღებოდ დავტოვოთ ვითარება, როდესაც შეშფოთება ჩნდება კანონის უზენაესობის ან დემოკრატიული ინსტიტუტების ფუნქციონირების შესახებ ნებისმიერ წევრ სახელმწიფოში. ამ ასამბლეის პასუხისმგებლობაც რეაგირებაა. ნათელი უნდა იყოს, რომ დემონსტრანტების წინააღმდეგ ძალის არაპროპორციული ან უკანონო გამოყენება მიუღებელია და ამის გამოძიება უნდა მოხდეს. ანგარიშვალდებულება ინსტიტუციური სისუსტის ნიშანი არ არის, არამედ ეს დემოკრატიული სიმტკიცის ნიშანია“, - განაცხადა არმენ გევორგიანმა.

მისი თქმით, ასამბლეის „მიზანი მხოლოდ ხარვეზების გამოვლენა არ უნდა იყოს“.

„ჩვენი მიზანი უნდა იყოს, რომ ხელი შევუწყოთ დემოკრატიული პროგრესისთვის პირობების შექმნას. ამის გათვალისწინებით, მე მივესალმები დაბალანსებულ მიდგომას. მიუხედავად იმისა, რომ საქართველოში ბოლო დროს განვითარებული მოვლენები შეშფოთებას იწვევს, ჩვენ საქართველოს ხელისუფლებასა და ევროპის საბჭოს შორის დიალოგის შესაძლებლობა უნდა შევინარჩუნოთ. ამავდროულად, ჩვენი ერთ-ერთი პრიორიტეტი საქართველოში პოლიტიკური დიალოგის აღდგენის მხარდაჭერა უნდა იყოს. ასევე, როგორც რეგიონის წარმომადგენელი, ის, რასაც დღეს საქართველოში ვხედავთ, ფართო რეგიონული გამოწვევის ნაწილია. სამხრეთ კავკასიაში დემოკრატიული განვითარება მზარდი ზეწოლის წინაშეა. ის, რაც დღეს ერთ ქვეყანაში მისაღებია, ხვალ შეიძლება მისაღები მეორეში გახდეს. როდესაც ჩვენი ორგანიზაცია ერთ ქვეყანაში პოლიტიკური კონკურენციის შეზღუდვასა და სადავო არჩევნებს უშვებს, მაშინ ეს სხვაგან ახალ ნორმად იქცევა. ჩვენ უნდა ვებრძოლოთ რეალობას, სადაც დემოკრატიული ინსტიტუტები ადგილზეა, მაგრამ თავად დემოკრატია ქრება“, - აღნიშნა არმენ გევორგიანმა.