ჩვენი შორ მანძილზე მოქმედი ოპერაციები რუსეთის მიერ უკრაინულ ქალაქებზე თავდასხმებსა და ომის გაჭიანურებაზე თანმიმდევრული და ზუსტი პასუხია, - ამის შესახებ უკრაინის პრეზიდენტი, ვოლოდიმირ ზელენსკი სოციალურ ქსელში წერს.

„გასულ ღამეს, თავდაცვის ძალების ქვედანაყოფებმა კრასნოდარის მხარეში მდებარე „პოლტავსკაიას“ ნავთობბაზაზე დარტყმა განახორციელეს. სამიზნე ფრონტის ხაზიდან დაახლოებით 300 კილომეტრში მდებარეობს. დღეს დილით, უკრაინის უსაფრთხოების სამსახურმა უფაში ორ ნავთობგადამამუშავებელ ქარხანას, „ბაშნეფტ-უფანეფტეხიმსა“ და „ბაშნეფტ-ნოვოილს“ დაარტყა. ეს კი ფრონტის ხაზიდან 1500 კილომეტრის დაშორებითაა“, - წერს ზელენსკი X-ზე.

მისი თქმით, უკრაინა შორ მანძილზე მოქმედი „სანქციების“ გეგმას ახორციელებს.

„რუსები რეალურ დიპლომატიაზე უნდა ფიქრობდნენ და არა იმაზე, თუ როგორ გააცურონ სხვები და დრო მოიგონ. ეს ომი უნდა დასრულდეს“, - აცხადებს ზელენსკი.