განსაკუთრებით სასიხარულოა, რომ რადიკალურად შეიცვალა სიძულვილის გამოხატულება სოციალურ მედიებში - აღმოჩნდა, რომ თურმე, რა ადვილი ყოფილა ამ პრობლემის გადაწყვეტა , - ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებთან განაცხადა.

მისივე თქმით, სიძულვილი და სიძულვილის წახალისება, რომელიც დღეს პროევროპულობის სიმბოლოდ იქცა, სინამდვილეში არის ერების დაქვემდებარების ინსტრუმენტი.

"ჩემთვის განსაკუთრებით სასიხარულოა, რომ როგორც შინაგან საქმეთა მინისტრის მოადგილემ აღნიშნა, ამ სამმართველოს ამოქმედებიდან სულ რაღაც ორ კვირაში, რადიკალურად შეიცვალა სიძულვილის გამოხატულება სოციალურ მედიებში და აღმოჩნდა, რომ თურმე, რა ადვილი ყოფილა ამ პრობლემის გადაწყვეტა, თურმე როგორ გვახვევდნენ თავს გამოხატვის თავისუფლების სახელით სინამდვილეში დაპირისპირების და საზოგადოების გავლენის ქვეშ მოქცევის ინსტრუმენტს.

სიძულვილი და სიძულვილის წახალისება, რომელიც დღეს პროევროპულობის სიმბოლოდ იქცა, სინამდვილეში არის ერების დაქვემდებარების ინსტრუმენტი, ვინაიდან, ის პრინციპი, რომელიც ჯერ კიდევ ძველ რომში მოქმედებდა, ეს პრინციპი მოქმედებს დღესაც - "დაყავი და იბატონე". ასე გვყოფდნენ, რომ ებატონათ ჩვენზე და გამოერეცხათ ტვინები ადამიანებისთვის და დაემორჩილებინათ მათი გენერალური ხაზისთვის, ვინაიდან, სიძულვილის ენის ერთ-ერთი მთავარი მიზანი იყო ადამიანების დათრგუნვა, ბულინგი, რომ მათ საკუთარი აზრი არ გამოეხატათ, მათ შორის, სოციალურ მედიაში, ამ ბულინგის შედეგად. ეს მოგვიტანა ამ პროევროპულმა მიდგომებმა, ვითომ, გამოხატვის თავისუფლებასთან დაკავშირებით", - განაცხადა პაპუაშვილმა.