როდესაც ისმის ევროპელი ლიდერების და ევროსტრუქტურებისადმი მუქარა, ამ მუქარის არსი ხომ უნდა გავიგოთ. ამ „მუქარის“ შედეგად ვინ ზიანდება?! გერმანია, საფრანგეთი, პოლონეთი? - ერთადერთი ქვეყანა ზიანდება - საქართველო. ვის „უკაჩავებენ პრავებს?“ მხოლოდ ქართულ სახელმწიფოს და მის სახელმწიფოებრივ ინტერესებს, - ასე შეაფასა „ლელო-ძლიერი საქართველოს“ ერთ-ერთმა ლიდერმა, ფიქრია ჩიხრაძემ „პალიტრანიუსის“ გადაცემა „დღის ნიუსრუმში“ მმართველი გუნდის წარმომადგენლების განცხადებები ევროპული ინსტიტუციებისადმი.

მისივე თქმით, შესაძლოა კითხვის ნიშნის ქვეშ დადგეს ევროკავშირში გაწევრიანება, ხოლო მეორე მხრივ, ევროსაბჭოს წევრობაც კი.

„საქართველოს პრემიერი არ წარმოადგენს საქართველოს, სახელმწიფოს და მის ინტერესებს. ის წარმოადგენს ერთი კაცის ინტერესებს, ეს არის ბიძინა ივანიშვილი.

სამწუხაროა, რომ ამ ქვეყანაში ყველაფერი: ქვეყნის საგარეო პოლიტიკა, საშინაო პოლიტიკა, სოციალური და სასამართლო პოლიტიკა მორგებულია ერთი კაცის ინტერესებზე. საგარეო ველზე ძალიან დამძიმებულია ვითარება. ევროპარლამენტის ბოლო ანგარიში და რეზოლუცია ცხადად აჩვენებს, რომ ძალიან მძიმე ვითარებაა საერთაშორისო ორგანიზაციებში გაწევრიანებასა ან ყოფნასთან დაკავშირებით. შესაძლოა, ერთ შემთხვევაში, ევროკავშირში გაწევრიანება, ხოლო მეორე მხრივ, ევროსაბჭოს წევრობაც კი კითხვის ნიშნის ქვეშ დადგეს.

როდესაც ისმის ევროპელი ლიდერების და ევროსტრუქტურებისადმი მუქარა, ამ მუქარის არსი ხომ უნდა გავიგოთ. ამ „მუქარის“ შედეგად ვინ ზიანდება?! გერმანია, საფრანგეთი, შვეიცარია, პოლონეთი? - ერთადერთი ქვეყანა ზიანდება, საქართველო და მისი სახელმწიფოებრივი ინტერესები. ევროკავშირი გვინდა, რათა ეს არის ყველაზე ხანგრძლივი, მშვიდობიანი გაერთიანება. აქ ყოფნა თუნდაც კანდიდატ წევრად, ნიშნავს, რომ გვაქვს სერიოზული ხელშეწყობა ეკონომიკაში, განათლებაში, სასამართლო სისტემის მოწყობაში. ჯანდაცვის პრობლემა იმდენად მძიმეა, რომ უამრავი ადამიანი მიდის ევროპულ ქვეყნებში, ე.წ. ჩაბარება ხდება, რათა ადეკვატური დახმარება მიიღონ. ვის ემუქრება საკუთარი სახელმწიფოს წინააღმდეგ მავნებლური მავნებლური ბაქი-ბუქი? ვის „უკაჩავებენ პრავებს?“ მხოლოდ ქართულ სახელმწიფოს და მის სახელმწიფოებრივ ინტერესებს“,- აღნიშნა ჩიხრაძემ.

გარდა აღნიშნული საკითხისა, ფიქრია ჩიხრაძემ, კოალიცია ცვლილებისთვის“ ერთ-ერთი ლიდერის, „დროას“ დამფუძნებლის, ელენე ხოშტარიაზეც ისაუბრა, რომლის ჯანმრთელობის მდგომარეობა საპატიმროში გართულდა. როგორც ჩიხრაძემ აღნიშნა, ეს არის ხელისუფლების პასუხისმგებლობის თემა.

„სამართლიან და უსამართლო გადაწყვეტილებებზე, სასამართლო სისტემაზე ხელისუფლებაში მყოფი პოლიტიკური ძალაა პასუხისმგებელი. ქალმა პოლიტიკოსმა, რომელმაც ბანერზე დაწერა საკუთარი პოზიცია, რომელიც ჯდება გამოხატვის თავისუფლების ფარგლებში, თუ არადა ადმინისტრაციულ სასჯელს ექვემდებარება, ჩვენ ვნახეთ, რომ დაპატიმრებულია. მას კიდევ მიმდინარე პროცესი აქვს, „საბოტაჟის საქმეზე“ ემუქრება პატიმრობა. ეს არის ხელისუფლების პასუხისმგებლობის თემა. ხელისუფლების ის პოზიცია და შეფასებები, რომელსაც ისინი იყენებენ ე.წ. დანაშაულის აღიარებასთან დაკავშირებით, არის ანტიადამიანური, ანტიჰუმანური“, - აღნიშნა ჩიხრაძემ.