ოპოზიციონერი პოლიტიკოსი ქალები საქართველოში აკრედიტებული დიპლომატიური კორპუსის წარმომადგენლებს შეხვდნენ, სადაც ელენე ხოშტარიას ჯანმრთელობის მდგომარეობის დამძიმებაზე ისაუბრეს.

როგორც „დროას“ მიერ გავრცელებულ ინფორმაციაშია ნათქვამი, შეხვედრაზე ასევე განიხილეს ქალთა უფლებრივი მდგომარეობა ქვეყანაში, მათ შორის ქალების როლი წინააღმდეგობის პოლიტიკურ და სამოქალაქო მოძრაობაში.

„დღეს პოლიტიკოსი ქალები საქართველოში აკრედიტებული დიპლომატიური კორპუსის წარმომადგენლებს შეხვდნენ. შეხვედრაზე ყურადღება გამახვილდა ელენე ხოშტარიას ჯანმრთელობის მდგომარეობის დამძიმებაზე პოლიტიკური პატიმრობის პირობებში და იმ რისკებზე, რაც მის ჯანმრთელობას და სიცოცხლეს შეიძლება შეექმნას.

შეხვედრაზე ასევე განიხილეს ქალთა უფლებრივი მდგომარეობა ქვეყანაში, მათ შორის ქალების როლი წინააღმდეგობის პოლიტიკურ და სამოქალაქო მოძრაობაში, აქტივისტებისა და ქალი პოლიტიკოსების წინაშე არსებული გამოწვევები და ზეწოლის პრაქტიკა. შეხვედრაზე აღინიშნა, რომ დემოკრატიული პროცესების, ადამიანის უფლებებისა და პოლიტიკური თავისუფლებების დაცვის კუთხით საერთაშორისო პარტნიორების ჩართულობას განსაკუთრებული მნიშვნელობა აქვს.

პოლიტიკოსი ქალები მომავალშიც გააგრძელებენ მსგავს ფორმატში მუშაობას“,- აღნიშნულია „დროას“ მიერ გავრცელებულ ინფორმაციაში.