რატომ არ აფასებთ იმ პროექტების ეფექტიანობას, რომლებმაც სახელმწიფო ინვესტიციების, უფასოდ გადაცემული ქონების თუ სხვა დახმარების და ხელშეწყობის მიუხედავად, ვერ შექმნეს დაპირებული სამუშაო ადგილები და ეკონომიკური ეფექტი ანუ არ შეასრულეს ნაკისრი ვალდებულებები? - ამ კითხვით მიმართა „გახარია საქართველოსთვის“ საპარლამენტო ფრაქციის თავმჯდომარემ, შალვა კერესელიძემ პრემიერ-მინისტრ ირაკლი კობახიძეს, რომელიც პარლამენტში წლიური მოხსენებით გამოდის.

კერესელიძე დაინტერესდა, არის თუ არა ამის მიზეზი ის, რომ ასეთი საშეღავათო პირობების მქონე ინვესტორების დიდი ნაწილი ხელისუფლებასთან დაკავშირებული პოლიტიკური გარემოცვაა.

„გრძელვადიანი სტრატეგიული გეგმის მიხედვით, ქვეყანაში გაზის მოხმარების ზრდის პარალელურად, რა წყაროებით იგეგმება გაზმომარაგების დეფიციტის შევსება? ხომ არ განიხილება „გაზპრომიდან“ იმპორტის წილის კიდევ ზრდა, როცა 2025 წელს რუსული გაზის იმპორტი დაახლოებით 40%-ით გაზარდეთ? ასევე დაგვიზუსტეთ - აზერბაიჯანის რესპუბლიკასთან გაზმომარაგებაზე მაისში რა ხელშეკრულება გააფორმეთ - გახანგრძლივდა ე.წ. დამატებითი გაზის კონტრაქტი თუ ახალ კონტრაქტთან გვაქვს საქმე? ითვალისწინებს თუ არა ეს კონტრაქტი სამხრეთ კავკასიურ მილსადენში (ბაქო-თბილისი-ერზერუმი) საქართველოს კუთვნილი სატრანზიტო მოცულობების დროებით, გრძელვადიან ან მუდმივ დათმობას ან გადაცემას? ცვლის თუ არა ეს შეთანხმება აზერბაიჯანი (ყაზახი)-საგურამოს მაგისტრალური მილსადენის გამტარუნარიანობას? რა მოცულობის ბუნებრივი აირის მიღებაა ტექნიკურად შესაძლებელი ყაზახი-საგურამოს მილსადენის მეშვეობით, რა მდგომარეობაშია ამჟამად აღნიშნული ინფრასტრუქტურა და არსებობს თუ არა მისი ამორტიზაციის ან ექსპლუატაციასთან დაკავშირებული სხვა რისკები?“ - მიმართა შეკითხვით კერესელიძემ პრემიერს.