ვხედავთ, რომ ამერიკაში კიდევ უფრო ამკაცრებენ „ფარას“ კანონს. ყველა ქვეყანა გამოდის თავისი ინტერესებიდან და ჩვენც უნდა ვიმოქმედოთ და გავატაროთ ის პოლიტიკა, რაც, პირველ რიგში, დაიცავს ქართულ სახელმწიფოებრიობას, ჩვენს სუვერენიტეტს, დამოუკიდებლობას და ქართველ ხალხს, - ამის შესახებ დედაქალაქის მერმა, „ქართული ოცნების“ გენერალურმა მდივანმა, კახა კალაძემ ჟურნალისტის კითხვის საპასუხოდ განაცხადა, თუ როგორ შეაფასებს ამერიკის შეერთებულ შტატებში „ფარას“ კანონის გამკაცრებას.

კახა კალაძემ ქართული ოპოზიციის მიერ „უცხოური გავლენის გამჭვირვალობის შესახებ“ კანონზე გაკეთებული შეფასებების კომენტირებისას განაცხადა, რომ „რამდენიმე პოლიტიკური პარტიის გარდა, ქვეყანაში ოპოზიცია არ არსებობს და არსებობს მხოლოდ აგენტურა“.

„ქვეყანაში ოპოზიცია არ არსებობს, თუ არ ჩავთვლით რამდენიმე პოლიტიკურ პარტიას. არსებობს აგენტურა და აგენტები, რომლებიც არიან კონკრეტული გარე ძალების წარმომადგენლები. პირდაპირ შეიძლება ითქვას, რომ ისინი არიან ამ ქვეყნის მტრები და ყოველთვის მიდიან ქართველი ხალხის წინააღმდეგ. საზოგადოებამ უნდა იცოდეს, ვინ ვინ არის.

რაც შეეხება კონკრეტულ კანონებს, რა თქმა უნდა, გამჭვირვალობა ჩვენთვის მნიშვნელოვანია და იმიტომ არის, რომ დღემდე არავის პასუხი არ დაუბრუნებია და არგუმენტი არ წარმოუდგენია იმასთან დაკავშირებით, თუ რატომ არის გამჭვირვალობა ცუდი, რატომ ეწინააღმდეგება ევროპულ ღირებულებებს და ევროინტეგრაციას. შესაბამისად, ვხედავთ, რომ ამერიკაში კიდევ უფრო ამკაცრებენ FARA-ს კანონს.

ყველა ქვეყანა გამოდის თავისი ინტერესებიდან და ჩვენც უნდა ვიმოქმედოთ და გავატაროთ ის პოლიტიკა, რაც, პირველ რიგში, დაიცავს ქართულ სახელმწიფოებრიობას, ჩვენს სუვერენიტეტს, დამოუკიდებლობას და ქართველ ხალს“, - განაცხადა დედაქალაქის მერმა.

ამასთან, ის გამოეხმაურა ევროპარლამენტის ბოლო რეზოლუციას და განაცხადა, რომ ის დაცლილია სამართლიანობისგან.

„ბევრჯერ გვინახავს ამ ტიპის რეზოლუციები, რომლებსაც ნამდვილად არანაირი ფასი არ აქვს, დაცლილია სამართლიანობისგან, სიმართლისგან, მხოლოდ და მხოლოდ ტყუილი, სიცრუე და მუქარაზე დაფუძნებული განცხადებებია. ამის მიზანი ვიცით, რაც არის - ყველაფერს აკეთებენ, რომ როგორმე ქვეყანაში არეულობა გამოიწვიონ, მოახდინონ რევოლუცია და სათავეში მოიყვანონ თავიანთი ქვეშევრდომები, რომლებიც მათ დავალებებს, თუნდაც ქვეყნის წინააღმდეგ გადასადგმელ ნაბიჯებს განახორციელებენ ყოველგვარი კითხვის გარეშე“, - აღნიშნა კალაძემ.

გარდა ამისა, კახა კალაძემ ოპოზიციაში მიმდინარე დაპირისპირებაზე საუბრისას განაცხადა, რომ ყოველდღე ჩვეულებრივი რეალითი შოუა ოპოზიციის განცხადებები.

„ხედავთ, რა პროცესები მიმდინარეობს. ყოველდღე ჩვეულებრივი რეალითო შოუა მათი განცხადებები, თავდასხმები, ერთმანეთის მიმართ შეურაცხყოფა. თავიდანვე ნათელი იყო, რომ ვერავითარი ერთობა ვერ შედგებოდა, მიუხედავად იმისა, რომ პატრონებმა ძალიან მოინდომეს საერთო პლატფორმის შექმნა“,- აღნიშნა კალაძემ.