არც ერთი შენობა, რომელიც დაკავშირებულია უნივერსიტეტების იდენტობასთან, არ გასხვისდება - რა თქმა უნდა, სხვა შემთხვევაში შეიძლება ვიფიქროთ პრივატიზაციაზე და შესაბამისი რესურსების ახალი ინფრასტრუქტურისკენ მიმართვაზე, - ამის შესახებ პრემიერ-მინისტრმა ირაკლი კობახიძემ პარლამენტის პლენარულ სხდომაზე განაცხადა.

კობახიძის თქმით, საუნივერსიტეტო ინფრასტრუქტურასთან დაკავშირებით ზოგადი გეგმა ასეთია: ახალი ინფრასტრუქტურა ძირითადად ორ ლოკაციაზე, თბილისსა და ქუთაისში განვითარდება. მისივე განცხადებით, უნდა გაფართოვდეს რეგიონული უნივერსიტეტების ინფრასტრუქტურა.

„რაც შეეხება არსებულ შენობა-ნაგებობებს, აქ ძალიან მარტივად უნდა გავმიჯნოთ კონკრეტული შენობები, რომელიც დაკავშირებულია კონკრეტული უნივერსიტეტების იდენტობასთან, სხვა შენობებისგან. არც ერთი შენობა, რომელიც დაკავშირებულია უნივერსიტეტების იდენტობასთან, არ გასხვისდება - რა თქმა უნდა, სხვა შემთხვევაში შეიძლება ვიფიქროთ პრივატიზაციაზე და შესაბამისი რესურსების ახალ ინფრასტრუქტურისკენ მიმართვაზე. ეს არის ზოგადი მიდგომა“, - განაცხადა ირაკლი კობახიძემ პარლამენტის პლენარულ სხდომაზე.