სამწუხაროა, რომ თქვენმა მოთმინებამ ვერ შეძლო ამ ყველაფრის ღირსეულად გამკლავება, თქვენ პოლიტიკოსები არ ხართ. თქვენ ვერც ამ ქვეყნის ეროვნულობას იცავთ, ვერც ამ ქვეყნის ღირსებას, ვერც ქრისტიანობას, რადგან ის, რაც ახლა ამ დარბაზში მოხდა ქრისტიანობასთან საერთო არაფერი აქვს, - ასე მიმართა პარლამენტში სიტყვის გამოსვლის დროს, „გახარია საქართველოსთვის“ დეპუტატმა ვიკა ფილფანმა უმრავლესობის წევრებს.

მისი თქმით, პოლიტიკოსისთვის მთავარი იარაღი და ძალა სიტყვაა.

„ბატონო ირაკლი, გილოცავთ! ნამდვილად წარმატებული იყო თქვენი ანგარიში. იმედია, გამოიწევით ჩემკენაც, ბატონო გენო? ახლა დამშვიდდით და მომისმინეთ.

ბატონო ირაკლი, ასე ხდება, როცა საკუთარ გუნდს ეჭვი ეპარება თქვენში, თქვენს სიძლიერეში და თქვენს პასუხებში. ასე ხდება, როცა თქვენ ვერ გაეცით კითხვებს პასუხები და ტრიბუნიდან უამრავი სიცრუე თქვით, იმის ნაცვლად, რომ კითხვებისთვის გეპასუხათ, ჭორაობა დაიწყეთ, პასუხისმგებლობების სხვაზე გადაბარება.

შეგახსენებთ, რომ სიტყვა არის პოლიტიკოსის მთავარი ძალა და იარაღი, ამ დარბაზში მოგვისმენია და გვინახავს არაერთი შეურაცხყოფა.

სამწუხაროა, რომ თქვენმა მოთმინებამ ვერ შეძლო ამ ყველაფრის ღირსეულად გამკლავება, თქვენ პოლიტიკოსები არ ხართ! თქვენ ვერც ამ ქვეყნის ეროვნულობას იცავთ, ვერც ამ ქვეყნის ღირსებას, ვერც ქრისტიანობას, რადგან ის, რაც ახლა ამ დარბაზში მოხდა ქრისტიანობასთან საერთო არაფერი აქვს.

ჯერ კიდევ საქართველოს დიადი და დიდი მწერლები წერდნენ, ალბათ ეს თქვენს უმეტესობას წაკითხული არ აქვს, რომ ერთ ადამიანზე თავდასხმა და წაქცეულის ცემა, არც კაცობა არ არის. მე არ ვიცი თქვენი უმეტესობა სად გაიზარდა, მაგრამ მე ისეთ კულტურაში გავიზარდე, სადაც კაცობა ვაჟკაცური საქციელით გამოიხატება“,- განაცხადა ვიკა ფილფანმა.

ამ სიტყვების შემდეგ ვიკა ფილფანს სიტყვით გამოსვლის დრო ამეწურა და დროის დამატება მოითხოვა, რაზეც პარლამენტის თავმჯდომარემ განუცხადა, რომ სხდომათა დარბაზში დაპირისპირების შემდეგ, მისგან „ნოტაციებს“ ვერ მოისმენს.