პრეზიდენტი ალიევი რომ ბრძანდებოდა საქართველოში, მთელმა საქართველომ ნახა ის კადრები, როგორ იდექით კუთხეში, რაც მიუთითებს თქვენს რეალურ როლს და ადგილს ხელისუფლებაში. როგორი პრემიერი არ ყოფილია საქართველოს მაგრამ ასეთი ნამდვილად არ ჰყოლია, - ამის შესახებ „გახარია საქართველოსთვის“ დეპუტატმა, გიორგი შარაშიძემ პლენარულ სხდომაზე განაცხადა, სადაც პრემიერი ირაკლი კობახიძე ანგარიშით წარსდგა.

შარაშიძის თქმით, პრემიერი, რომელიც არის კონსტიტუციით პირველი პირი პარტიაში მეორე კაცია.

მის აღნიშნულ სიტყვებს უმრავლესობის წევრებისგან რეპლიკები მოჰყვა.

„ამ გამოძახილებით თქვენ არაფერი არ მოგემატებათ ბატონო არჩილ, ზუსტად ის არჩილ გორდულაძე იქნებით როგორიც ხართ. ტყუილად ნუ ირჯებით.

არა თუ ქვეყანა, „ქართული ოცნებაც“ არ იმსახურებს ასეთ პრემიერ-მინისტრს, დარწმუნებული ვარ, შეძახილებში კი მაგრები არიან მაგრამ, დარწმუნებული ვარ, რომ აქ დეპუტატებიდან ძალიან ბევრნი მეთანხმებიან. არაერთხელ გვინახავს, როგორ ემიჯნებიან ისინი მათ შორის თქვენს ყოფილ კოლეგებს და ყველანი გავხდებით მომსწრე იმისა, რომ როცა დადგება დრო და როგორ გაგემიჯნებიან...“- განაცხადა გიორგი შარაშიძემ.

გიორგი შარაშიძის სიტყვით გამოსვლის დროს, სხდომათა დარბაზში უმრავლესობისა და ოპოზიციის წარმომადგენლები დაუპირისპირდნენ, რის შემდეგაც სხდომის მიმდინარეობა შეჩერდა.