პარტია „გახარია საქართველოსთვის“ დეპუტატის, ტატა ხვედელიანის განცხადებით, პარლამენტის სხდომათა დარბაზში მომხდარი ფიზიკური დაპირისპირება ადასტურებს, რომ ქვეყანაში „ქართული ოცნების“ მოძალადეობრივი რეჟიმია.

როგორც ხვედელიანმა „პალიტრანიუსის“ გადაცემაში „რეზიუმე“ განაცხადა, პარლამენტში ვითარება გიორგი შარაშიძის გამოსვლის დროს დაიძაბა.

მისივე თქმით, ფიზიკური დაპირისპირების შედეგად ოპოზიციის რამდენიმე დეპუტატმა დაზიანებები მიიღო და საჭირო გახდა სასწრაფო სამედიცინო დახმარების გამოძახება.

„ამით დასტურდება „ოცნების“ მოძალადეობრივი რეჟიმის არსებობა ჩვენ ქვეყანაში. საკუთარი რაოდენობრივი უპირატესობით, ასეთ ქმედებას მიმართეს. დასტურდება ის, რასაც ვიძახით, რომ ძალადობრივი რეჟიმია. მათი არაკომპეტენტური პრემიერი მობრძანდა საქართველოს პარლამენტში. ვერცერთ კითხვას ვერ გასცა პასუხი. ისევ ჩვეული დემაგოგიით სცადა გასულიყო ფონს. ბოლოს, მისი ანგარიშის შეფასების დროს, გიორგი შარაშიძის გამოსვლის დროს ატეხეს აგრესიული ქმედებები და შეძახილები. მთელი დღე მიმდინარეობდა ეს შეძახილები, სხვანაირად ვერ გასცემდნენ პასუხებს, ვერცერთ კრიტიკულ კითხვას ვერ გასცა პასუხი. ადამიანი, რომელიც საოკუპაციო ხაზთან არ არის ჩასული და დაუფარავი ანექსიური პროცესების შესახებ დუმილს არჩევს, მოძალადეობრივი რეჟიმია და ყველამ კარგად დაინახა როგორ ძალადობდნენ, როგორ მოგვაქციეს ალყაში.

ჩვენ არ ვართ ოპოზიციის ის ნაწილი, რომელიც ყველაფერს თავის სახელს არ დაარქმევს. მოძალადეებს აუცილებლად მივუთითებ, რომ მოძალადეები არიან. კორუმპირებულებს მივუთითებთ, რომ კორუმპირებულები არიან.

ფიზიკური დაზიანება მიიღეს დეპუტატებმა. ჩვენ სასწრაფოს გამოძახებაც მოგვიწია. მეტნი არიან და სპორტსმენებიც არიან მათ რიგებში, რა თქმა უნდა, მივიღებდით დაზიანებას",- განაცხადა ტატა ხვედელიანმა.