აშშ-მა, ისრაელმა და ლიბანმა სამმხრივ ჩარჩო შეთანხმებას მოაწერეს ხელი. ამის შესახებ ინფორმაციას აშშ-ის სახელმწიფო დეპარტამენტი ავრცელებს.

“დღეს, ისრაელისა და ლიბანის მთავრობებმა მამაცი გადაწყვეტილება მიიღეს, შეთანხმდნენ ჩარჩოზე, რომელიც რეალისტურ გზას ქმნის უსასრულო კონფლიქტიდან. ეს შეთანხმება ნათელ და სტრუქტურულ პროცესს აყალიბებს ლიბანის სუვერენიტეტის აღსადგენად, “ჰეზბოლას” განიარაღებისთვის და მისი ტერორისტული ინფრასტრუქტურის ჩამოსაშლელად. ეს საშუალებას აძლევს ისრაელს თავის საზღვრებს დაუბრუნდეს მას შემდეგ, რაც მისი მოქალაქეებისადმი საფრთხე მოშორებულ იქნება. ის ასევე ქმნის სამმხრივ სამხედრო საკოორდინაციო ჯგუფს ლიბანისთვის (MCG4L), შეერთებული შტატების ხელშეწყობით, რომელიც საშუალებას აძლევს ორივე მხარეს ამ ჩარჩო შეთანხმების განხორციელებისთვის. ლიბანისთვის ეს ჩარჩო შეთანხმება ნამდვილ გზას ქმნის ხანგრძლივი კრიზისიდან. ისრაელისთვის ის სანდო გზას ქმნის მისი ჩრდილოეთ საზღვრისთვის მუდმივი საფრთხის მოსაშორებლად", - ნათქვამია განცხადებაში.

სახელმწიფო დეპარტამენტის განცხადებაში ასევე აღინიშნება, რომ შეერთებული შტატები სრულიად ჩართული დარჩება და მნიშვნელოვან რესურსებს გაიღებს, მათ შორის დაუყოვნებლივ 100 მილიონ აშშ დოლარს ჰუმანიტარული დახმარებისთვის გაეროსთან კოორდინაციაში. აშშ ასევე აპირებს გააუმჯობესოს ლიბანის შეიარაღებული ძალების შესაძლებლობები და უნარები, რათა მათ უფრო ეფექტურად დაამყარონ სუვერენიტეტი ლიბანის მთელ ტერიტორიაზე. ამისთვის, აშშ-ის ომის დეპარტამენტი მზად არის ლიბანის შეიარაღებულ ძალებს 30 მილიონ აშშ დოლარზე მეტი გადასცეს, რათა მხარი დაუჭიროს პრეზიდენტ ტრამპის ხედვას ლიბანში მყარი მშვიდობის დამყარებაზე.